Një ngjarje tragjike ka tronditur qytetin e Peruxhias dhe komunitetin shqiptar në Itali, kur Hekuran Cumani, një 23-vjeçar shqiptar, u vra me thikë në orët e para të së shtunës pranë universitetit.
Sipas hetimeve të Prokurorisë, ngjarja është klasifikuar si vrasje me dashje dhe ka ndodhur pas një grindjeje të cilat konsiderohen “të parëndësishme”. Viktima u godit në fyt dhe në gjoks, plagë që rezultuan fatale. Ndihma e shpejtë që mbërriti në vendngjarje nuk mundi ta shpëtojë Hekuranin, i cili kishte udhëtuar për një mbrëmje me miqtë në Peruxhia.
Grupi i Cumanit është përfshirë në debate me të rinj të tjerë jashtë një lokali të njohur, “110 Caffè”, pranë Departamentit të Matematikës. Sherri verbal u transformua në përleshje fizike, ku një person i paidentifikuar e goditi me thikë, duke i marrë jetën. Miqtë e tij e përshkruajnë Hekuranin si një djalë të qetë dhe të dashur, i apasionuar pas palestrës dhe jetës së shëndetshme.
Hetuesit janë duke marrë dëshmitë e të pranishmëve gjatë incidentit dhe po analizojnë kamerat e sigurisë në zonë për të identifikuar autorin. Ngjarja ka ngjallur gjithashtu shqetësim në autoritetet lokale, të cilat kanë shprehur dhimbjen për humbjen e jetës së të riut. Kryetari i bashkisë së Peruxhias dhe Këshilli Komunal e përshkruan ngjarjen si një tragjedi që prek të gjithë qytetin. “Dhimbja e këtyre orëve shtrihet në të gjithë qytetin. Peruxhia qëndron me ata që po vuajnë dhe reflekton me hidhërim për këtë tragjedi,” thuhet në deklaratën e tyre.
Ky incident ka ngritur shqetësime mbi sigurinë në zonën përreth universitetit dhe ndikon thellë në moralin e komunitetit, duke nxjerrë në pah pasigurinë e krijuar nga aktet e dhunshme mes të rinjve.
