Botërori nuk ka nisur ende, por një sërë polemikash tashmë kanë shpërthyer. Edicioni më i pasur i të gjitha kohërave pritet të regjistrojë ankesa të përditshme në lidhje me strukturat akomoduese të ekipeve në qytete të ndryshme.
Polemika më e fundit ka të bëjë me hotelet ku do të strehohen skuadrat. I pakënaquri i parë erdhi nga trajneri i Holandës, Ronald Koeman, pasi skuadra u akomodua në hotelin Cascade të Kansas City në prag të debutimit kundër Japonisë. Futbollistët dhe stafi kishin kritikuar edhe më parë një hotel 4 yjesh në New York, ku ishin akomoduar për ndeshjen miqësore me Uzbekistanin, dhe Koeman nuk e la pa nënvizuar pakënaqësinë e skuadrës: “Le të themi që mund të bëhej më mirë”, tha ai në konferencën për shtyp, ndërsa të martën, me mbërritjen në Missouri, anuloi stërvitjen e parashikuar. Teksti vë në dukje edhe se hoteli ku Holanda do të flejë në pjesën e parë të Botërorit është po ashtu një strukturë me 4 yje.
Holanda nuk është e vetmja që do të strehohet jashtë rrethit të hoteleve ekstraluksoze. Në Kansas City do të akomodohen edhe Anglia dhe Argjentina, ndërsa sistemimet janë “këshilluar” nga FIFA, që ka ofruar mbështetje edhe për kërkimin e fushave stërvitore.
Disa kombëtare zunë seli më turistike dhe me oferta luksi: Franca është në Boston dhe akomodohet te Four Seasons, Brazili në New York te Ridge Hotel, ndërsa Zvicra zgjodhi resortin Fairmont Grand Del Mar në San Diego. Megjithatë, edhe këto zgjedhje sollën shqetësime: zviceranët raportuan praninë e gjarpërinjve helmues pak metra larg dhomave të lojtarëve dhe pati edhe një zjarr në zonë.
Teksti thekson se polemikat rreth akomodimeve pritet të jenë të shumta gjatë këtij Botërori, ndërsa disa skuadra duket se janë më të kënaqura me vendet e qëndrimit sesa të tjera. Top Channel.
