Një helikopter ushtarak amerikan u rrëzua pranë Ngushticës së Hormuzit të hënën, duke detyruar shpëtimin e dy anëtarëve të ekuipazhit, njoftuan zyrtarët amerikanë. Në komunikimin e Komandës Qendrore të SHBA-së (CENTCOM) bëhet me dijeni se mjeti ishte një AH-64 Apache dhe se rrëzimi ndodhi pranë brigjeve të Omanit, teksa po kryente një mision patrullimi në atë zonë.
Dy pilotët u lokalizuan dhe u nxorrën nga vendi i ngjarjes rreth dy orë pas incidentit. Zyrtarët konfirmuan se të dy ishin jashtë rrezikut për jetën dhe gjendja e tyre shëndetësore përshkruhet si e qëndrueshme. Operacioni i shpëtimit u krye me ndihmën e një droni detar amerikan, por autoritetet nuk kanë bërë publike detaje të mëtejshme rreth llojit të mjetit pa pilot të përdorur. Një zyrtar amerikan, i cili u citua nga ABC News, tha se droni kishte një dizajn të ngjashëm me një motoskaf; përveç kësaj nuk është dhënë informacion shtesë zyrtar rreth karakteristikave teknike ose operacionale të tij.
Shkaqet që çuan në rrëzimin e helikopterit mbeten të paqarta. Forcat ushtarake amerikane kanë nisur hetime për të përcaktuar rrethanat dhe faktorët që çuan në incident, pa dhënë akoma një shpjegim përfundimtar. INCIDENTI ndodhi pranë një prej korridoreve detare më të rëndësishme në botë; Ngushtica e Hormuzit konsiderohet një pikë strategjike për transportin ndërkombëtar të energjisë dhe për këtë arsye monitorohet vazhdimisht nga forcat ushtarake të vendeve të ndryshme.
Zyrtarët ushtarakë kanë raportuar vetëm informacionin bazë të nisjes dhe shpëtimit, dhe hetimet e vazhdueshme pritet të sqarojnë më tej rrethanat e aksidentit dhe çdo element tjetër operativ që mund të ketë luajtur rol.
