Ilir Meta prej 18 muajsh ndodhet në paraburgim; pamjet e fundit publike të tij ishin ato të arrestimit më 21 tetor 2024. Në seancën e parë gjyqësore ndaj tij, e cila u transmetua online këtë të hënë, ish-presidenti u shfaq pas kafazit të xhamit dhe sipas vëzhgimeve kishte pësuar ndryshim në pamje e humbje në peshë. Pranë tij ishin ish-bashkëshortja Monika Kryemadhi dhe avokati Kujtim Cakrani.
Zylyftar Bregu, përfaqësues i Komitetit Shqiptar të Helsinkit, dha në emisionin “Top Story” disa detaje rreth jetës së Metës në paraburgim, duke theksuar se nuk mund të zbardh shumë gjëra për shkak të një marrëveshje me organizatën. Bregu tha se u habit nga gjendja fizike e tij kur u takuan dhe sqaroi elemente të përditshmërisë në qeli që lidhen me gjendjen shëndetësore.
Sipas tij, ka të burgosur që ndajnë qelinë dhe organizohen me një “kalendar” që familjet t’u sjellin ushqime në ditë të caktuara të javës, për të siguruar ushqim të freskët. Meta qëndron i vetëm në qeli; autoritetet e burgut lejojnë që familja t’i sjellë ushqimin e freskët vetëm një herë në javë. Ai refuzon të hajë “ushqimin e komandës” dhe zgjedh të konsumojë gjatë gjithë javës ushqimin që i sjellin një herë në javë. Bregu përmendi gjithashtu se ekziston një kufizim kilogramash për ushqimin, por sipas tij struktura e burgut nuk e njeh këtë kufizim në mënyrë të përhershme, vetëm kur dëshiron të respektojë rigorozisht rregulloren.
Meta u ankua se nuk merrte kohën e duhur të ajrimit dhe mungesën e rrezeve të diellit gjatë 1.5 viteve në paraburgim. Ai dilte vetëm një herë në ditë në ajrim, por nuk përfitonte kohën prej dy orësh që pretendon se duhet. Bregu tha se Meta jetonte i vetëm edhe për shkak të një plani masash të posaçme të sigurisë të marrë nga Drejtoria e Përgjithshme e Burgjeve. Lajmi u publikua nga Top Channel.
