Jimmy Rimmer, ish-portieri i Manchester United dhe Aston Villa, ka ndërruar jetë në moshën 78-vjeçare, njoftoi Aston Villa, e cila e kujtoi atë si një prej futbollistëve të saj që fitoi Kupën e Europës. I lindur në Lancashire, Rimmer u formua në akademinë e Manchester United dhe ishte pjesë e skuadrës që fitoi Kupën e Europës në vitin 1968, megjithëse në finalen ndaj Benficës qëndroi në stol. Ai qëndroi te Manchester United për nëntë vjet, përballë portierit titullar Alex Stepney, para se të transferohej te Arsenali në vitin 1974, ku regjistroi rreth 150 paraqitje.
Tre vite më vonë u bashkua me Aston Villa dhe aty kaloi periudhën më të suksesshme të karrierës së tij. Me klubin e Birmingham zhvilloi 229 ndeshje në kampionat dhe ishte titullar në të gjitha ndeshjet e fushatës që çoi ekipin drejt triumfit në Kupën e Europës në vitin 1982. Në finalen përballë Bayern Munich luajti vetëm në nëntë minutat e para përpara se të zëvendësohej.
Rimmer pati një karrierë që zgjati më shumë se 20 vjet në nivelet e larta të futbollit. Pas largimit nga Aston Villa në vitin 1983, ai vazhdoi karrierën te Swansea City për tre sezone. Në vitin 1986 pati aventura të shkurtra me Hamrun Spartans në Maltë dhe me Luton Town. Aston Villa dhe Manchester United kanë shprehur ngushëllimet për familjen dhe të afërmit e ish-portierit.
Ish-shoku i tij i skuadrës te Manchester United, Alex Stepney, reagoi gjithashtu pas lajmit, duke shprehur trishtim për ndarjen nga jeta të Rimmer; Stepney kishte bërë me dije vetëm një ditë më parë se ish-partneri i tij në portë nuk ishte në gjendje të mirë pas një rrëzimi. Rimmer njihet si një prej futbollistëve të rrallë që ka qenë pjesë e dy skuadrave angleze fituese të Kupës së Europës: Manchester United në vitin 1968 dhe Aston Villa në vitin 1982.
