Është zbardhur marrëveshja mes Komisionit të Rithemelimit dhe Lëvizjes Socialiste për Integrim, të cilët do të hyjnë së bashku në zgjedhjet e 6 Marsit.
Përveç Kryemadhit dhe LSI-së në koalicionin me Berishën është dhe Partia Demokristiane e drejtuar nga Nard Ndoka.
Në marrëveshje thuhet se Kryemadhit i lind e drejta që të dërgojë emrat e kandidatëve në KQZ, ndërkohë që koalicioni do të drejtohet nga Endrit Braimllari.
Në marrëveshjen politike të koalicionit thuhet se:
“Ne po bashkohemi si parti dhe si qytetarë për t’i sjellë ndryshimin Shqipërisë. Ne bashkohemi që të garantojmë fitoren në zgjedhjet e ardhshme dhe t’i sjellim ndryshim vendit tonë.
Të gjithë e dimë që duhet ndryshim. Shqiptarët janë të fortë, Shqipëria është e fortë. Ka vetëm një përgjegjës për dënimin e Shqipërisë në 8 vitet e fundit dhe ky është Edi Rama.
Ne po ndajmë të njëjtat vlera e parime në veprimtarinë e përgjithshme politike, si dhe në vizionin për qeverisjen e vendit. Dëshirojmë të koordinojmë angazhimet dhe kontributin për fitoren e përbashkët dhe prandaj:
VENDOSËM QË:
1.Të formojmë një Koalicion të gjerë opozitar për të konkurruar së bashku në zgjedhjet e pjesshme për kryetar bashkie në bashkitë, Shkodër, Dibër, Durrës, Rrogozhinë, Vorë dhe Lushnjë, të datës 06 Mars 2022.
2.Emri i koalicionit është “Shtëpia e Lirisë”
3.Shkronjat nistore të koalicionit do të jenë “SH-L”.
Drejtuese politike e koalicionit është Partia Demokratike e Shqipërisë, përfaqësuar nga Komisioni i Përkohshëm i Rithemelimit”.
