Industria e manifakturës po përballet me një nga periudhat më të vështira, ndërsa sektori i fasonerisë po humbet vende pune dhe kompani. Nga rreth 65 mijë punonjës që kishte dikur, sot numri ka rënë në rreth 40 mijë, sipas të dhënave të Shoqatës “Manifaktura Shqiptare” të bëra publike në një takim me bizneset e sektorit të fasonerisë në qarkun e Elbasanit, me fokus kryesisht tek tekstilet. Nga rreth 700 njësi fasonerie që kanë qenë pjesë e shoqatës, rreth 150 janë mbyllur vitet e fundit.
Përfaqësuesit e bizneseve në qarkun e Elbasanit shprehin se situata po rëndohet vit pas viti. Ata lidhin rënien e aktivitetit me disa faktorë të jashtëm dhe të brendshëm: rënien e euros, rritjen e çmimit të naftës dhe kostot e përgjithshme të prodhimit. Këta faktorë, sipas biznesve, kanë ndikuar drejtpërdrejt në aktivitetin e fasonerive dhe në marrëdhëniet me partnerët e huaj, duke vështirësuar konkurrueshmërinë dhe stabilitetin e kontratave ndërkombëtare.
Përballë kësaj situate, “Manifaktura Shqiptare” ka propozuar një paketë masash për t’u përfshirë në Paketën Fiskale 2027, me synimin për të lehtësuar barrën financiare mbi sektorin dhe për të stimuluar rimëkëmbjen. Shoqata ka paraqitur gjashtë masa, ndër të cilat përmenden: lehtësimi i kostos së punës, rritja e amortizimit fiskal për investimet, ulja e tarifave doganore për lëndët e para, lehtësira për fitimin e riinvestuar dhe krijimi i një fondi grantesh për teknologjinë dhe automatizimin. Këto propozime synojnë uljen e kostove operative, incentivimin e investimeve në teknologji dhe përmirësimin e kushteve për reinvestime që rrisin produktivitetin.
Takimi në Elbasan nxori në pah humbjen e punësimit dhe të njësive prodhuese si shenja të një trende negative në sektorin e fasonerisë, duke kërkuar ndërhyrje të synuara politike dhe fiskale për të mbështetur rimëkëmbjen dhe konkurrueshmërinë e industrisë.
