Bashkim Ulaj, me bekimin e Edi Ramës, shkel ligjin, mjedisin dhe ujin e banorëve, ndërsa një TEC i ndaluar në BE ndërtohet në mes të tokës bujqësore shqiptare për të prodhuar energji që shkon 90% në Greqi.
Edi Rama firmosi lejen për TEC-in me mazut në Roskovec, një projekt të refuzuar nga qeveria greke dhe i ndaluar nga tre konventa të BE-së. Enti Rregullator i Energjisë e licencoi me shpejtësi të dyshimtë, pavarësisht shkeljeve ligjore dhe mungesës së burimit të detyrueshëm ujor. Pas padive të shoqërisë civile, ERE u detyrua të pezullojë licencën, por kompania “Fier Thermoelectric” e Bashkim Ulajt ka nisur të grabisë ujin e pijshëm dhe atë bujqësor të fshatrave të Roskovecit, me bekimin e bashkisë dhe heshtjen e institucioneve. Ndërkohë, 90% e energjisë së prodhuar do të eksportohet në Greqi, duke e lënë ndotjen, rrezikun dhe pasojat mbi territorin dhe shëndetin e shqiptarëve. Shqipëria trajtohet si zonë eksperimentale për teknologji të ndaluara në Bashkimin Europian.
Më 18 dhjetor 2024, Edi Rama firmosi lejen për ndërtimin e TEC-it me mazut në Roskovec për kompaninë “Fier Thermoelectric”, në pronësi të oligarkut Bashkim Ulaj dhe kompanisë greke “GEK TERNA S.A.” të Efstathios Natsis dhe Georgios Kouvaris.
Më 26 maj 2025, pronarët e TEC-it i kërkuan Entit Rregullator të Energjisë (ERE) pajisjen me licencë prodhimi të energjisë elektrike, dhe brenda dy javësh, më 9 qershor, ERE e miratoi kërkesën, pavarësisht mangësive në dokumentacion, shkeljes së kritereve mjedisore dhe mungesës së një burimi të veçantë ujor, që është kusht ligjor për funksionimin e TEC-it.
Pas padive civile dhe kallëzimeve penale të shoqatave “Zharrëza” dhe “Shoqata e Bujqësisë Organike dhe Mjedisit”, Enti Rregullator i Energjisë filloi procedurat për anulimin e licencës së TEC-it.
Më 7 gusht 2025, me Vendimin Nr. 181, ERE pezulloi licencën e prodhimit deri në përfundimin e proceseve gjyqësore, dorëzimin e dokumenteve të plota dhe verifikimin e kushteve të detyrueshme mjedisore, përfshirë sigurimin e një impianti të veçantë furnizimi me ujë teknologjik.
Ligji e ndalon shprehimisht furnizimin e TEC-it me ujë nga rrjeti publik dhe nga burimet bujqësore, për të shmangur ndotjen nga mazuti dhe mbetjet toksike që TEC-i prodhon. Por kompania “Fier Thermoelectric”, në vend që të ndërtojë burimin dhe impiantin e vet të ujit, ka nisur një operacion ilegal për të marrë ujin e pijshëm dhe atë të bujqësisë nga banorët e zonës.
Bashkia Roskovec, e cila miratoi lejen pa konsultim publik, po i lejon kompanisë të ndërhyjë në rrjetin e ujësjellësit dhe të manipulojë burimet ujore të baseneve, duke grabitur ujin e fshatrave Suk-1, Suk-2, Arapaj, Strum, Velmish, Drenovicë, Samaticë, Rrëzë, Gorican, Kutalli etj.
Agjencia e Menaxhimit të Baseneve Ujore dhe Drejtoria e Ujësjellës-Kanalizimeve Fier nuk po ndërhyjnë, pasi e dinë se Bashkim Ulaj është i lidhur me kryeministrin Edi Rama, i cili i urdhëroi institucionet t’i përgatisnin dokumentet paraprake për lejen e TEC-it.
Skandali thellohet kur zbardhet një tjetër fakt: 90% e energjisë që do prodhojë TEC-i në Roskovec do të eksportohet në Greqi dhe vetëm 10% do të përdoret në Shqipëri.
Por ajo që e bën edhe më absurd projektin është se qeveria greke e ka refuzuar ndërtimin e këtij TEC-i në Janinë, për shkak të kundërshtimeve të banorëve dhe sepse e ndalojnë tre konventa europiane për mbrojtjen e mjedisit.
Ndërkohë, Edi Rama e pranoi të ndërtohej në Roskovec, duke e trajtuar Shqipërinë si territor eksperimentesh mjedisore dhe shqiptarët si popull të dorës së tretë.
Ky projekt është një ndër veprat më të pastra të kapjes së shtetit nga oligarkët: një TEC me mazut, teknologji e viteve ’70, i ndaluar në vendet e BE-së, që Rama e pranon me servilizëm të plotë si pjesë e pazarit të tij me klientët ekonomikë dhe me kompanitë e huaja që Shqipërinë e trajtojnë si zonë industriale pa standarde./Pamfleti
