Një 59-vjeçar, identifikuar si Saim Myrtaj, ka humbur jetën pasi ra nga skela e një kantieri ndërtimi në Rivabella të Riminit. Ngjarja ndodhi rreth orës 13:30 të së hënës. Pas tragjedisë, Prokuroria e Riminit ka hapur hetim për vrasje nga pakujdesia, aktualisht ndaj personave të paidentifikuar, për të zbardhur rrethanat e aksidentit.
Një prej pikave kryesore të hetimit është përcaktimi i shkakut të rënies: autoritetet po verifikojnë nëse Myrtaj humbi aksidentalisht ekuilibrin, nëse ka patur ndonjë problem shëndetësor apo nëse kanë pasur rol kushtet e sigurisë në kantier. Hetuesit kanë vendosur nën sekuestro skelën nga e cila ra 59-vjeçari; do të kontrollohen struktura e saj, sistemet mbrojtëse, mënyrat e kalimit nga një nivel në tjetrin dhe respektimi i rregullave të sigurisë për punën në lartësi. Do të verifikohet gjithashtu çfarë pajisjesh personale mbrojtëse kishte veshur viktima në momentin e aksidentit.
Autopsia pritet të ketë një rol të rëndësishëm në hetim, për të përcaktuar me saktësi shkakun e vdekjes dhe dëmtimet, si dhe për të ndihmuar në rindërtimin e momenteve para rënies. Sipas rindërtimit paraprak, ende në verifikim, Myrtaj ndodhej i vetëm në nivelin e dytë të skelës, e vendosur përgjatë fasadës së jashtme të një pallati dykatësh ku kryheshin punime mirëmbajtjeje. Ai dyshohet se ka rënë përmes hapësirës në platformën e skelës që përdorej për kalimin e shkallës nga një nivel në tjetrin dhe, pas një rënieje prej disa metrash, përfundoi në tarracën e një apartamenti në katin e parë.
Alarmi u dha nga banori i apartamentit, i cili dëgjoi një përplasje të fortë dhe njoftoi autoritetet. Në vendngjarje mbërritën ekipet mjekësore, zjarrfikësit, Policia e Shtetit dhe teknikë të mjekësisë së punës. Në orët pas aksidentit është marrë në pyetje punëdhënësi i Myrtajt, pronar i një kompanie ndërtimi në zonë. Të dhënat e para tregojnë se Myrtaj kishte një numër identifikimi tatimor dhe punonte si artizan i pavarur për llogari të kompanive të tjera; më parë kishte pasur aktivitetin e tij në ndërtim. Ai ishte zhvendosur në Rimini në fillim të viteve 2000 dhe kishte punuar kryesisht si murator. La pas bashkëshorten dhe dy fëmijë. Shoqata Agimi Rimini shprehu ngushëllimet për familjen. Hetimet vijojnë për të përcaktuar nëse aksidenti ishte rastësor apo pasojë e shkeljeve të rregullave të sigurisë.
