Ervis Halimi dhe Musa Gudo janë autorët e grabitjes së ndodhur mëngjesin e ditës së djeshme në banesën e një të moshuari në Mallakastër.
Dy të rinjtë, 22 dhe 28 vjeç, kërcënuan me armë zjarri dhe dhunuan 89-vjeçarin Çaush Shehaj duke arritur t’i marrin një shumë parash. I moshuari ndodhet në spital ku po merr trajtimin mjekësor.
Policia ka proceduar penalisht edhe 16 vjeçarin F.Ç nën akuzën e moskallëzimit të krimit. Ndërsa është sekuestruar edhe arma e zjarrit tip automatik me të cilën është kryer grabitja.
Materialet do t’i kalojnë Prokurorisë pranë Gjykatës së Shkallës së Parë Fier, për veprat penale “Vjedhja me dhunë”, e kryer në bashkëpunim, “Plagosje e rëndë me dashje”, “Mbajtja pa leje e armëve dhe municionit luftarak” dhe “Moskallëzimi i krimit”.
