Pesë shtetas shqiptarë, përfshirë gra dhe fëmijë, u rikthyen sot në Shqipëri nga Siria në kuadër të një operacioni të riatdhesimit të koordinuar nga autoritetet shqiptare. Ata mbërritën me një avion charter dhe u pritën në pistë nga ministri i Brendshëm, Besfort Lamallari, dhe drejtori i Përgjithshëm i Policisë së Shtetit, Skënder Hita. Mes të rikthyerve janë emra të njohur për publikun: Hajrije Taushani, Myrvete Dibra dhe tre fëmijë, dy prej tyre vajza të mitura.
Hajrije Taushani, e përmendur prej vitesh në lidhje me shqiptarët në kampet e Sirisë, kishte shkuar atje për t’u kujdesur për familjarët e saj pas vdekjes së djalit. Në kamp ajo qëndroi bashkë me nipërit e saj, të cilët mbetën pa prindër. Sot Taushani është kthyer në Shqipëri së bashku me nipin e saj të mitur; ata ishin të parët që zbritën nga avioni pas mbërritjes.
Myrvete Dibra, gjithashtu mes të riatdhesuarve, ka qëndruar për vite në kampet siriane së bashku me vajzat e saj. Historia e saj është raportuar gjerësisht; më parë ajo dhe fëmijët ndodheshin në kampin Al-Hol dhe më pas në kampin Roj, ndërsa familjarët bënin thirrje të vazhdueshme për rikthimin e tyre. Emri i Dibrës lidhet në raportime edhe me emra të tjerë të grave shqiptare në kampet e Sirisë, përfshirë Hajrije Taushanin.
Në materialet e mëparshme është përmendur lidhja e Myrvete Dibrës me shtetasin malazez Hamid Beharović, i cili në vitin 2017 u përball në Mal të Zi me akuza për pjesëmarrje në një formacion të armatosur të huaj, të identifikuar nga prokuroria si organizatë terroriste ISIS/ISIL. Dokumentet e asaj kohe lidhnin udhëtimin e tij me Turqinë dhe Sirinë; Beharović i kishte mohuar akuzat për pjesëmarrje në luftime, duke pranuar se kishte qenë në Siri.
Pas mbërritjes, të rikthyerve u dhanë dhurata dhe më pas u transportuan me ambulanca për kontrolle mjekësore. Ministria për Evropën dhe Punët e Jashtme njofton se do të kryhen vlerësime shëndetësore dhe psikosociale, ndërsa institucionet përgjegjëse do të vijojnë procesin e akomodimit, rehabilitimit dhe riintegrimit. Task-Forca ndërinstitucionale do të vazhdojë punën për riatdhesimin e shtetasve të tjerë shqiptarë nga Siria, nëse krijohen kushtet e nevojshme për kthimin e tyre të sigurt.
