Boksieri shqiptar i peshave të rënda, Kristian Prenga, do të ngjitet në ring më 25 korrik për një nga sfidat më të rëndësishme të karrierës së tij, ku do të përballet me ish-kampionin e shumëfishtë të botës, Anthony Joshua.
Ndeshja do të zhvillohet në Jeddah, në një stadium me kapacitet prej rreth 50 mijë spektatorësh, ndërsa interesi për këtë përballje është jashtëzakonisht i madh. Eventi pritet të transmetohet drejtpërdrejt në platformën DAZN për publikun ndërkombëtar.
Përballja shënon një moment të rëndësishëm për boksin shqiptar, pasi Kristian Prenga bëhet boksieri i parë shqiptar që konkurron në një nivel kaq të lartë përballë një prej emrave më të mëdhenj të boksit botëror.
Në një intervistë të fundit, Prenga u shpreh se nuk lufton vetëm për veten, por për të gjithë shqiptarët.
“Nuk ngjitem në ring vetëm për veten time. Mbi supet e mia mbaj krenarinë e çdo shqiptari dhe do të jap maksimumin për ta bërë kombin tim krenar.”
Edhe në këtë duel historik, Kristian Prenga do të ngjitet në ring nën flamurin kuqezi, të cilin e ka përfaqësuar me krenari gjatë gjithë karrierës së tij, pavarësisht sfidave që ka kaluar.
Shqiptarët do ta ndjekin me vëmendje këtë përballje, me shpresën që Prenga të shkruajë një kapitull të ri në historinë e sportit shqiptar.
