Shkruan: Fabiana Marcolini
Ish-Kreu i SPAK-ut, Altin Dumani, është paditur në Itali nga kompania Meral sh.p.k, në pronësi të familjes Cela, e cila e akuzon për shpifje dhe kallëzim të rremë, pas sekuestrimit të disa pasurive me vlerë rreth 4 milionë euro në Verona.
Sipas medias italiane, ngjarja daton në korrik të vitit 2025, kur një hetim i përbashkët mes Prokurorisë së Tiranës dhe Gardës së Financës italiane çoi në sekuestrimin e një godine në Verona me rreth 30 dyqane dhe zyra, si edhe të një kompleksi tjetër në Nogarole Rocca në Verona.
Sipas informacionit të përcjellë nga SPAK, këto pasuri ishin blerë nga kompania Meral sh.p.k me para të ardhura nga veprimtari kriminale, konkretisht nga trafiku i kokainës.
Megjithatë, vetëm një muaj më vonë, më 4 gusht 2025, gjyqtarja italiane Paola Vacca anuloi vendimin për sekuestrimin dhe urdhëroi kthimin e të gjitha pasurive te pronarët. Sipas vendimit të saj, dokumentacioni i paraqitur nga avokatët e familjes Cela provonte se çdo euro ishte fituar në mënyrë të ligjshme përmes aktiviteteve tregtare dhe më pas ishte investuar ligjërisht.
Gjykata konstatoi gjithashtu se asnjë anëtar i familjes Cela nuk kishte precedentë penalë. Sipas artikullit, në dokumentacion rezultonte se ata nuk kishin as dënime penale dhe as hetime që të kishin përfunduar me vendim fajësie. Madje, media italiane shkruan se vetë SPAK kishte pushuar më parë disa procedime ndaj tyre në Shqipëri.
Pavarësisht se familjes Cela iu rikthyen pasuritë e sekuestruara, dëmet për kompaninë, sipas përfaqësuesve të saj, ishin të konsiderueshme. Llogaritë bankare u bllokuan, kreditë u ndërprenë dhe aktiviteti ekonomik u paralizua. Edhe marrëdhëniet me bankat u ndërprenë, ndërsa zyrat e kompanisë mbetën pa mirëmbajtje, duke sjellë probleme me qiramarrësit.
Pas këtyre zhvillimeve, përfaqësuesi ligjor i Meral sh.p.k vendosi të padisë në Itali kreun e ish-kreun e SPAK-ut, Altin Dumani, duke pretenduar se informacioni i përcjellë autoriteteve italiane ishte i pavërtetë dhe se i kishte shkaktuar kompanisë dëme të mëdha ekonomike dhe në reputacion.
Prokuroria e Veronës kërkoi që padia të pushohej, por gjyqtari Enrico Zuccon nuk e pranoi këtë kërkesë në këtë fazë. Ai vendosi t’i japë prokurorisë edhe dy muaj kohë për të kryer hetime shtesë.
Sipas vendimit të gjykatës, autoritetet italiane duhet të sigurojnë të gjithë dokumentacionin e dërguar nga Tirana dhe të verifikojnë nëse Prokuroria shqiptare kishte dijeni për vendime të mëparshme të pushimit të hetimeve ose për vendime të tjera që binin ndesh me akuzat e dërguara në Itali. Gjithashtu, do të verifikohet nëse këto vendime u janë komunikuar autoriteteve italiane ose janë përfshirë në dokumentacionin zyrtar.
Media italiane shkruan se avokatët e familjes Cela kanë dorëzuar edhe certifikata të gjendjes gjyqësore, të përkthyera zyrtarisht, nga të cilat rezulton se anëtarët e familjes nuk kanë dënime penale. Ata kanë depozituar gjithashtu vendime të Prokurorisë shqiptare që, sipas tyre, provojnë se hetimet e mëparshme ndaj familjes janë pushuar.
Nga ana tjetër, mbrojtja e Altin Dumanit ka kërkuar mbylljen e çështjes, duke argumentuar se padia është ngritur vetëm për ta bërë prokurorin shqiptar të papajtueshëm me hetimet e rëndësishme që ai po drejton ndaj grupeve të krimit të organizuar.
Në përfundim, gjykata italiane nuk pranoi as kërkesën e Prokurorisë së Veronës dhe as kërkesën e mbrojtjes së Altin Dumanit për pushimin e çështjes. Gjyqtari Enrico Zuccon urdhëroi vazhdimin e hetimeve, duke i lënë Prokurorisë edhe dy muaj kohë për të kryer verifikime shtesë mbi dokumentacionin e dërguar nga autoritetet shqiptare. Pas përfundimit të këtyre hetimeve, gjykata do të vendosë nëse procedimi ndaj Altin Dumanit do të vijojë më tej apo do të pushohet.
Burimi lajmit: https://www.larena.it/territorio-veronese/citta/case-comprate-con-soldi-della-droga-la-srl-denuncia-il-procuratore-di-tirana-1.13088193
