Luigi Mangione u deklarua fajtor për akuzat federale lidhur me vrasjen e drejtorit ekzekutiv të UnitedHealthcare, Brian Thompson. Ai pranoi se e ndoqi drejtuesin në një konferencë investitorësh në 2024 dhe e qëlloi atë në një rrugë të Nju Jorkut. Mangione tha gjithashtu se përdori një dredhi për të mbledhur informacione rreth ngjarjes, duke kontaktuar paraprakisht kompaninë e sigurimeve shëndetësore dhe duke u shtirur si investitor në një kompani multi-miliardë dollarëshe.
“Mëngjesin e 4 dhjetorit 2024, unë qëllova Thompsonin në Manhattan dhe ai vdiq”, i tha Mangione gjykatës, ndërsa gruaja e viktimës, Paulette, e ndoqi gjyqin dukshëm e tronditur dhe me lot në sy. Dënimi i tij është caktuar për 18 dhjetor. Kur gjykatësi federal e pyeti nëse e kuptonte që mund të kalonte pjesën tjetër të jetës në burg, Mangione u përgjigj shkurt: “Po”.
Pala mbrojtëse tha se seanca e pranimit të fajësisë u planifikua me nxitim në gjykatën federale të Manhattanit, dhe me këtë Mangione zgjidhi një nga dy çështjet që rëndonin kundër tij lidhur me vdekjen e Thompson. Avokatët e tij tani po kërkojnë që çështja e veçantë për vrasje që është në pritje në shtetin e Nju Jorkut të rrëzohet, duke përmendur parimin e rrezikut të dyfishtë (double jeopardy).
Mangione i tha gjykatës se e sulmoi Thompsonin “pasi vuajti për vite me radhë nga dhimbje të forta për shkak të një shtylle kurrizore të thyer dhe u përpoq të kapërcente barrierat e sistemit të sigurimeve shëndetësore”. Sipas policisë dhe kompanisë, Mangione nuk ka qenë kurrë klient i UnitedHealthcare. Ai është diplomuar në Universitetin e Pensilvanisë dhe vjen nga një familje e pasur e Merilendit.
Autoritetet arrestuan Mangione pesë ditë pas të shtënave, kur u pa në një McDonald’s në Altoona të Pensilvanisë, rreth 230 milje në perëndim të Manhattanit. Si çështja federale ashtu edhe ajo shtetërore mund të rezultojnë në burgim të përjetshëm për të.
