FIFA i ka hequr Dinamos masën që e kufizonte në regjistrimin e lojtarëve, duke i hapur klubit mundësinë të bëjë përforcime përpara ndeshjeve të fazës playoff të Conference League. Klubi konfirmoi lajmin përmes një komunikate zyrtare në faqen e tij, duke njoftuar se, pas përmbushjes së të gjitha procedurave dhe detyrimeve përkatëse, është i lirë të regjistrojë lojtarë të rinj si në nivel kombëtar ashtu edhe ndërkombëtar.
Sipas komunikatës, masa lidhej me një detyrim administrativ me vlerë modeste dhe jo me problematika financiare ose detyrime të papaguara ndaj futbollistëve dhe stafit. Klubi shpjegon se çështja nuk u trajtua në kohë nga struktura përgjegjëse, por tani është zgjidhur plotësisht dhe janë marrë masat e nevojshme për të shmangur përsëritjen e situatave të tilla.
FC Dinamo City thekson në deklaratë se ka financa të shëndosha dhe garanton korrektësi dhe përgjegjshmëri në përmbushjen e detyrimeve financiare ndaj futbollistëve, stafit dhe partnerëve. Klubi thotë se do të vijojë të funksionojë mbi parimet e përgjegjshmërisë institucionale, transparencës dhe respektimit të rregulloreve kombëtare e ndërkombëtare.
Me heqjen e masës, Dinamo do të vazhdojë normalisht aktivizimin në merkato dhe punën për forcimin e skuadrës, në funksion të objektivave për sezonin në vazhdim. Në raundin e playoff-it të Conference League, Dinamo do të përballet me ekipin e Pafos; ndeshjet janë të parashikuara të luhen më 20 dhe 27 gusht.