Ish-prokurori Eugen Beci, i ftuar në emisionin “Top Story” nga Grida Duma, deklaroi se SPAK po heton dy kompani të lidhura me industrinë e armatimit, AAT dhe TIMAK Defence. Ai tha se hetimi nuk lidhet me 140 milionë eurot e shpenzuara për fishekë dhe veshje, por me aktivitetin e këtyre dy kompanive, që ai i përshkroi si “bijat” e KAYO-s.
Beci theksoi se problemi kryesor është AAT, e krijuar me objekt kryesor prodhimin e armatimit ushtarak, por që sipas të dhënave zyrtare rezulton e licencuar vetëm për tregti, magazinim dhe transport të armatimit ushtarak, pa licencë apo kapacitete reale për prodhim. “Është një mospërputhje mes objektit të prodhimit dhe licencës reale të tregtimit”, deklaroi ai, duke shtuar se kjo mospërputhje, së bashku me përgjime të dorëzuara në Prokurorinë e Posaçme, ka ngritur dyshime për trafik armësh.
Beci i përmendi edhe një përgjim ku flitet për dërgimin e armëve në Ukrainë: një ukrainas i thotë Ronit, “Do marrim ca armë t’i çojmë në Ukrainë”, ndërsa Ronny i përgjigjet se do të shkojë në Sudan bashkë me ambulancat. Sipas Becit, hetuesit po verifikojnë një skemë të dyshuar ku armët mund të kenë ardhur nga Sudani, të kenë marrë në Shqipëri logon AL dhe më pas të jenë dërguar drejt Ukrainës. Ai citoi edhe shprehjen “Shkoj në Sudan, vijnë armët” dhe tha se Prokuroria e Posaçme po kontrollon nëse dokumentacioni dhe licencat mund të jenë përdorur për trafik armësh.
Në fokus është edhe TIMAK Defence, për të cilën Beci tha se u krijua në një kohë kur KAYO kishte marrë 10.5 milionë euro. Prokuroria po verifikon aktivitetin dhe vendndodhjen e kompanisë. “Ku është vendosur kjo kompani? Është vendosur në një ambient të sekuestruar më parë nga Prokuroria e Posaçme?”, pyeti ai. Në përfundim, Beci tha se këto elemente ngrejnë, sipas tij, një dyshim të arsyeshëm për trafik armësh ose shpërdorim detyre.
