Dy nga rrugët më të rëndësishme detare të botës po përballen njëkohësisht me tensione gjeopolitike që rrisin pasigurinë për tregtinë dhe transportin ndërkombëtar. Në Ngushticën e Hormuzit, korridor kyç për eksportin e naftës dhe gazit nga Gjiri Persik, numri i kalimeve ditore të anijeve të mëdha tregtare ka rënë ndjeshëm: të enjten u regjistruan vetëm 7 kalime, krahasuar me rreth 125 në ditë para nisjes së luftës. Në të njëjtën kohë, rreth 2 mijë kilometra më në perëndim, rebelët Huthi kanë zgjeruar praninë e tyre në brigjet e Jemenit dhe kanë mbërritur në ishullin strategjik Perim, në zemër të ngushticës Bab el-Mandeb.
Pozicioni i Perimit është i rëndësishëm për transportin detar, pasi ndodhet në një prej pikave kyçe që lidh Oqeanin Indian me Detin e Kuq dhe, përmes Kanalit të Suezit, shërben si një prej lidhjeve kryesore tregtare mes Azisë, Lindjes së Mesme dhe Evropës. Megjithatë, Bab el-Mandeb nuk është aktualisht i mbyllur për trafikun tregtar: të enjten kaluan 26 anije, një shifër e afërt me mesataren prej 27 anijesh në ditë gjatë dhjetë ditëve të mëparshme.
Shqetësimi kryesor për operatorët e transportit dhe siguruesit është rritja e rrezikut. Prania e Huthive në Perim mund të ndikojë kostot e sigurimit, sigurinë e ekuipazheve dhe detyrojë devijime të anijeve nëse situata përkeqësohet. Situata në Hormuz paraqitet më e rëndë, me reduktimin drastik të trafikut që reflekton ndërprerjen e një pike thelbësore për furnizimin energjetik global. Me trafikun në Hormuz të kufizuar, rrugët alternative për transportin e naftës drejt brigjeve të Detit të Kuq marrin më shumë rëndësi, dhe përshkallëzimi i aktivitetit të Huthive rrit presionin mbi zinxhirin energjetik rajonal.
Autoritetet e qeverisë së njohur ndërkombëtarisht të Jemenit po përgatiten për një kundërofensivë për të rimarrë territoret e humbura, ndërsa përplasja po ndikon edhe në marrëdhëniet mes Riadit dhe Uashingtonit. Nëse tensionet vijojnë, kompanitë mund të detyrohen të shmangin Bab el-Mandeb dhe të përdorin rrugën më të gjatë përmes Kepit të Shpresës së Mirë, çka do të rritej kostot, kohën e udhëtimit dhe primeve të sigurimit. Për tregtinë globale shqetësuese është kombinimi i dy krizave: një rënie dramatike në Hormuz dhe presioni ushtarak në Bab el-Mandeb.
