Agjencia e Mbikëqyrjes në Sistemin e Ekzekutimit të Vendimeve Penale (AMSEVP), në bashkëpunim me Drejtorinë e Përgjithshme të Burgjeve, ka kryer kontrolle në IEVP-të e Peqinit dhe Fierit, gjatë të cilave janë sekuestruar dy aparate celularë dhe janë marrë masa procedurale për disa të burgosur dhe punonjës policie.
Në IEVP Peqin, gjatë kontrollit të sendeve personale të të burgosurit me inicialet F. Ç., është gjetur një aparat celular. Pas veprimeve të para procedurale, AMSEVP arrestoi në flagrancë të burgosurin për veprën penale “Futja ose mbajtja e sendeve të ndaluara në institucionin e ekzekutimit të vendimeve penale”, sipas nenit 324/a/2 të Kodit Penal. Për të njëjtin rast, në gjendje të lirë janë proceduar penalisht katër të burgosur me inicialet M. H., L. Gj., I. L. dhe F. A., për veprën penale “Moskallëzimi i krimit”. Po ashtu, janë proceduar në gjendje të lirë dy punonjës policie të IEVP Peqin, me inicialet Sh. K. dhe E. J., të dyshuar për veprën penale “Shpërdorimi i detyrës”.
Në IEVP Fier, gjatë kontrollit në ambientet e dhomës së të burgosurit R. K. u gjet një tjetër aparat celular. Pas përfundimit të veprimeve procedurale, i burgosuri R. K. u procedua në gjendje të lirë për veprën penale “Futja ose mbajtja e sendeve të ndaluara në institucionin e ekzekutimit të vendimeve penale”. Në të njëjtin institucion, u procedua në gjendje të lirë edhe i burgosuri E. B. për veprën penale “Moskallëzimi i krimit”.
AMSEVP njofton se materialet procedurale të përpiluar pas këtyre kontrolleve do t’u dërgohen për veprime të mëtejshme Prokurorive pranë Gjykatave të Shkallës së Parë të Juridiksionit të Përgjithshëm Elbasan dhe Fier.
