Qeveria gjermane synon të rrisë taksën mbi produktet e duhanit më shumë se parashikimi fillestar, si pjesë e një pakete masash për mbrojtjen e shëndetit publik dhe për të rritur të ardhurat në buxhetin federal. Sipas një propozimi të Ministrisë së Financave, të siguruar nga Rrjeti Editorial Gjerman, çmimi i një pakete me 20 cigare pritet të shkojë afër 12 euro deri në vitin 2030, rreth 40 cent më shumë se parashikimi i mëparshëm.
Rritja e taksave parashikohet të aplikohet në mënyrë graduale, me ndryshime të zbatueshme çdo vit. Masa nuk do të kufizohet tek cigaret konvencionale, por do të përfshijë edhe duhanin me mbështjellje, duhanin për pipë, purot dhe produktet alternative si lëngjet për cigaret elektronike. Për këto të fundit, pjesa e taksës do të rritet me një cent për mililitër çdo vit sipas propozimit.
Qeveria prezanton këto ndryshime jo vetëm si mjet për të përmirësuar gjendjen e financave publike, por edhe për të ulur numrin e duhanpirësve, me fokus të veçantë te të rinjtë. Autoritetet e financave vlerësojnë se rritja e taksave do t’i sjellë buxhetit shtetëror rreth 756 milionë euro të ardhura shtesë në vitin 2027. Në plan afatgjatë, deri në vitin 2030, ato pritshmëri e çojnë këtë shifër mbi 3.5 miliardë euro në vit.
Propozimi i Ministrisë së Financave, i cili përmban normat e reja të taksimit dhe reduktimet e parashikuara në konsumin e duhanit, ende duhet të kalojë nëpër procedurat përkatëse legjislative përpara se të bëhet zyrtare dhe të fillojë zbatimi i plotë. Burimi i informacionit të publikuar në lidhje me këtë plan është Rrjeti Editorial Gjerman.
