Kosova përballet me një ditë vendimtare politike, pasi skadon afati kushtetues për zgjedhjen e presidentit të ri, ndërsa procesi parlamentar për ndryshimin e Ligjit për Dhomat e Specializuara mbetet i papërfunduar, duke i lidhur të dy zhvillimet. Deri në orët e mëngjesit nuk ishte paralajmëruar zyrtarisht ndonjë seancë e Kuvendit apo mbledhje të komisioneve parlamentare, por gjatë ditës mund të thirret një seancë e jashtëzakonshme në përpjekje për të zgjidhur ngërçin politik.
Nëse Kuvendi zgjedh presidentin brenda afatit kushtetues, legjislatura do të vazhdojë mandatin dhe deputetët do të mund të vijojnë procedurat për çështjet e pazgjidhura, përfshirë projektligjin për ndryshimin e Ligjit për Dhomat e Specializuara, i cili nuk ka përfunduar procesin parlamentar. Kryetari i Komisionit për Legjislacion, Vigan Qorrolli, ka bërë thirrje që deputetët gjatë ditës të votojnë si për presidentin e ri, ashtu edhe për ndryshimet për Dhomat e Specializuara, duke theksuar lidhjen e të dy çështjeve me nevojën për funksionimin e institucioneve dhe shmangien e një cikli të ri zgjedhor.
Në rast se Kuvendi dështon të zgjedhë presidentin brenda afatit, pritet shpërndarja e Kuvendit dhe shkuarja drejt zgjedhjeve të parakohshme. Kjo do të nënkuptonte ndërprerjen e punës së përbërjes së tanishme parlamentare dhe pamundësinë për të miratuar në lexim të dytë projektligjin për ndryshimin e Ligjit për Dhomat e Specializuara, ndaj dita konsiderohet afat kyç edhe për këtë çështje.
Gjithashtu mbetet e paqartë se kush do t’i ushtrojë kompetencat presidenciale në rast shpërndarjeje të Kuvendit, pasi mandati gjashtëmujor i Albulena Haxhiut si ushtruese e detyrës së presidentit ka përfunduar, dhe Kushtetuta nuk përcakton qartë pasuesin e kompetencave pas këtij afati. Në fund, skenarët kryesorë janë dy: zgjedhja e presidentit, që lejon vazhdimin e punës parlamentare dhe mundësinë e miratimit të ndryshimeve për Dhomat e Specializuara, ose dështimi, i cili do të çonte në shpërndarje të Kuvendit dhe pezullim të procesesh parlamentare. Për momentin mbetet e paqartë nëse deputetët do të mblidhen gjatë ditës; vendimi për thirrjen e një seance të jashtëzakonshme pritet të përcaktojë rrjedhën e ngjarjeve.
