Ai është një burrë me vese; ajo nuk i duron më gënjeshtrat dhe vendos të marrë një hipnotizues për të zbuluar të vërtetat e hidhura mes një çifti. Kjo është premisa e komedisë satirike “Detektori i gënjeshtrave”, në regji të Valdrin Hasanit.
Në role janë Çubi Metka, Kejdi Gishto dhe Erdit Asllanaj, që do të ngjiten në skenën e Teatrit Metropolit këtë fundjavë, më 19, 20 dhe 21 Qershor. Premiera u mbajt më 12 qershor në Teatrin Kombëtar, ndërsa më 22 dhe 24 qershor shfaqja do të vijojë në Teatrin Eksperimental. Vënia në skenë është mbështetur nga Bashkia Tiranë.
Aktorët sjellin personazhe me dinamizëm, kontradikta dhe situata komike, që synojnë të bëjnë publikun të qeshë, të reflektojë e të përlotet përmes dramatikës së fshehtë të çdo personazhi. Përmes personazheve dhe situatave familjare e intime, vepra thekson se gënjeshtrat e vogla, të padukshme por të vazhdueshme, shndërrohen në mekanizma mbijetese dhe njëkohësisht në burim konfliktesh dhe krizash emocionale.
Në qendër qëndron figura e “detektorit”, i cili pretendon të zbulojë të vërtetën absolute. Ndërsa ngjarjet zhvillohen, bëhet e qartë se asnjë nuk është i përjashtuar nga vetëmashtimi; detektori shërben si metaforë e autoritetit moral dhe e prirjes njerëzore për të gjykuar të tjerët, duke kthyer shfaqjen në një pasqyrë kritike të shoqërisë së sotme. Përmes humorit dhe satirës, vepra nxit dialog publik mbi pyetjet: a është e vërteta gjithmonë zgjidhja më e mirë, deri ku mbrojmë veten me një gënjeshtër dhe kur ajo bëhet pengesë për marrëdhënie të shëndetshme?
“Detektori i gënjeshtrave” paraqitet si një komedi inteligjente, aktuale dhe thellësisht njerëzore, që premton të jetë më shumë se një shfaqje teatrore: një ftesë për të reflektuar mbi të vërtetat që fshehim nga të tjerët dhe shpesh edhe nga vetja.
