Zbulohen detaje të reja lidhur me mashtrimin në tre call center-a në Tiranë, ku dy shtetas, Mateo Hoxha dhe Tedi Agastra, kanë përfituar mbi 8 milionë dollarë në kriptovaluta. Sipas dosjes së siguruar nga gazetarja Anila Hoxha, autoritetet austriake kanë informuar se Hoxha dhe Agastra kanë përfituar respektivisht 3.219.915 dhe 4.811.154 dollarë.
Hetimi ka zbuluar se Tedi Agastra, në bashkëpunim me babanë e tij, Arbëror Agastra, i cili zotëron një zyrë këmbimi valutor, ka realizuar këmbimin e këtyre kriptovalutave. Autoritetet austriake kanë konfirmuar se ky rrjet call center-ash kishte lidhje me këta dy shtetas si përfitues të kriptovalutave.
Në kuadër të një procedimi tjetër, janë lëshuar 19 urdhër arreste për veprat penale të “Ushtrimi pa licencë të veprimtarive financiare” dhe “Fshehja e të ardhurave”. Tedi Arbëror Agastra, njëri nga të arrestuarit, është identifikuar si bashkëpunëtor i babait të tij në zyrën “Alba Forex”, ku është dokumentuar këmbimi i kriptovalutave në para FIAT. Babai i tij është nën masën e sigurimit personal “Arrest në shtëpi”.
Mateo Hoxha, gjithashtu, rezulton të jetë i njohur dhe punonjës i zyrës “Alba Forex” që nga dhjetori 2024. Në datën 20.01.2025, autoritetet austriake kanë marrë kallëzime të reja nga shtetas austriakë, të cilët janë kontaktuar nga këshilltarë financiarë të supozuar për të investuar në platformën “imctrading”. Transaksionet janë kryer në data të ndryshme dhe lidhen drejtpërdrejt me Hoxhën dhe Agastrën, të cilët gjatë vitit 2024 kanë marrë vlera të konsiderueshme në adresa kripto dhe më pas i kanë transferuar ato.
