Rritja e çmimeve të pronave vazhdoi edhe në gjysmëvjetorin e dytë të vitit të kaluar. Indeksi Fischer i Bankës së Shqipërisë, që mat çmimin mesatar të banesave të shitura, tregon një rritje prej 28% në rang kombëtar krahasuar me vitin 2024. Banka e Shqipërisë vlerëson se kontributin kryesor në këtë rritje e kanë dhënë zonat bregdetare, ndërsa kryeqyteti ka shfaqur një ngadalësim të ndjeshëm. Sipas Bankës, “Vlera e indeksit për Tiranën tregoi ndryshime të lehta dhe kontributin kryesor në rritjen e indeksit e ka dhënë ecuria e çmimeve në bregdet”.
Rritja e çmimeve është mbështetur jo vetëm nga kërkesa vendase, por edhe nga blerjet e jorezidentëve, të cilat sipas vrojtimit përbëjnë rreth 25% të shitjeve, nga 15% në periudhën paraprake. Numri i pronave të pashitura ka rënë dhe koha mesatare e shitjes është shkurtuar, fakt që tregon se tregu po absorbon më shpejt ofertën. Banka raportoi se “Koha mesatare e shitjes së banesave në rang vendi ra në 9.1 muaj nga 11.6 muaj në vrojtimin e mëparshëm. Në rastin e Tiranës, koha mesatare e shitjes u ul ndjeshëm në 8.1 nga 11.1 muaj. Koha mesatare për shitjet në zonat bregdetare u rrit në 9.9 nga 8.7 muaj, ndërsa për zonat e tjera kohëzgjatja e shitjes rezultoi më e ulët sesa në gjashtëmujorin e kaluar, duke rënë në 10.1 nga 12.8 muaj”.
Një rol të rëndësishëm në rritjen e kërkesës ka luajtur kredia bankare. Blerjet e pronave vazhdojnë të financohen kryesisht me kredi, me huatë për banesa që janë shtytësi kryesor i rritjes së kredisë për individët. Teprica e kredisë për blerje banese arriti 240 miliardë lekë, 17% më shumë se një vit më parë. Ndërkohë, edhe pse bankat raportuan standarde më të shtrënguara të kreditimit, shkalla e miratimit të kredive për banesa u rrit.
