Erling Haaland, Kylian Mbappé e të tjerë po sfidojnë hegjemoninë në fushë, por në rrjetet sociale dominimi mbetet i Cristiano Ronaldo, Lionel Messi dhe Neymar, që janë futbollistët e Botërorit 2026 me më shumë ndjekës, një burim të madh të ardhurash dhe një vetrinë globale. Ronaldo, që të martën u bë futbollisti i parë që shënon në gjashtë edicione të ndryshme të Kupës së Botës, udhëheq renditjen me diferencë. Duke mbledhur të dhëna nga X, Instagram dhe Facebook, 41-vjeçari ka në total 950 milionë ndjekës: 668 milionë në Instagram, 110.1 milionë në X dhe 172.5 milionë në Facebook. Ai po kërkon golin e 1000-të në karrierë.
Sipas Wagner Leitzke, shef biznesi i Agjencisë End to End, rrjetet sociale kanë konsoliduar rolin e futbollistëve si platforma globale të influencës, duke rritur rëndësinë përtej rendimentit sportiv. Pas Ronaldo-s renditet Lionel Messi, kryesues i aktual i listës së golashënuesve në Botërorin 2026 dhe momentalisht shënuesi më i mirë në historinë e botërorëve me 18 gola. Argjentinasi ka 510 milionë ndjekës në Instagram dhe 117 milionë në Facebook, ndërkohë që nuk disponon llogari në X.
Në podium ndodhet Neymar, i cili, edhe pse nuk është më tipi “elektrik” i Barcelonës, ruan ndikim të madh, veçanërisht në Brazil. Neymar mungoi në dy ndeshjet e para të fazës së grupeve për shkak të dëmtimit, por mbetet një aset reklamues: gjysmë ore pas shpalljes së listës së Ancelotti-t për Botërorin, ai publikoi tre video të kompanive që e sponsorizojnë. Numrat e tij janë 236.5 milionë ndjekës në Instagram, 62.2 milionë në X dhe 92.1 milionë në Facebook.
Kylian Mbappé, kampion bote në 2018 dhe nënkampion në 2022, ka 131 milionë ndjekës në Instagram, 19.3 milionë në X dhe rreth të njëjtën shifër në Facebook; ai është afër Messit në klasifikimin e golashënuesve të këtij Botërori me 4 gola. Erling Haaland raportohet me 42.5 milionë ndjekës në Instagram, 11.1 milionë në X dhe rreth 20 milionë në Facebook.
