Pak orë para ndeshjes mes Atletico Madrid dhe Barcelonës, UEFA hodhi poshtë ankesën e klubit katalanas lidhur me një episod të kontestuar nga ndeshja e parë çerekfinale në Camp Nou. Atletico Madrid fitoi atë ndeshje me rezultatin 2-0, ndërsa Barcelona ankohej për një rast ku mbrojtësi Marc Pubill preku topin me dorë pas një rivënie nga portieri.
Më 9 prill, Barcelona paraqiti një notë proteste për vendimin e arbitrit që nuk akordoi penallti, duke theksuar se ky moment kishte pasur ndikim të drejtpërdrejtë në zhvillimin dhe rezultatin e ndeshjes. Gjithashtu, klubi protestoi për mosndërhyrjen e sistemit VAR, i cili nuk e thirri arbitrin Istvan Kovacs për të rishikuar rastin.
Megjithatë, Komisioni i Kontrollit, Etikës dhe Disiplinës në UEFA e shpalli protestën e Barcelonës si të papranueshme.
