Pushime familjare për një vëlla e motër, bashkë me partnerët e tyre, shqiptarë që jetonin në Amerikë, u kthyen në tragjedi pas një shpërthimi dhe shembjeje të ndërtesës ku ata po qëndronin në Greqi. Viktimat e identifikuara janë Florin Hoxha, motra e tij Florida Hoxha, bashkëshortja e Florin, Eris Cani, bashkëshorti i Florida-s, Ian Alexander Kirpatrick, si dhe pronarët e ndërtesës, Edmond Hings dhe Athina Papapresku.
Ngjarja ndodhi ditën e premte. Familjarët e viktimave mbërritën në Greqi pas thirrjes së autoriteteve të Shërbimit Mjeko-Ligjor të Athinës për të siguruar material gjenetik, nevojë e domosdoshme për krahasimin e ADN-së dhe përmbylljen e procesit të identifikimit të trupave. Hetimet për të përcaktuar shkakun e shpërthimit vazhdojnë.
Për të tretën ditë, një ekip i Shërbimit Helenik të Zjarrfikjes dhe Shpëtimit, përbërë nga dhjetë oficerë të specializuar, po kryen kontrolle të hollësishme në vendin e ngjarjes. Oficerët po mbledhin dhe vlerësojnë çdo element të mundshëm që mund të kontribuojë në përcaktimin e rrethanave të tragjedisë dhe në zbardhjen e shkakut të shpërthimit.
Hetimet e autoriteteve janë përqendruar në apartamentin e katit të dytë, ku jetonte çifti i të moshuarve, pasi sipas informacioneve paraprake ka një tregues të fortë që shpërthimi ka ndodhur aty. Sipas burimeve kompetente, ky apartament ishte i vetmi në ndërtesë që kishte furnizim me gaz natyror, i cili përdorej për kuzhinën dhe për një sobë.
Megjithatë, autoritetet theksojnë se do të duhet dokumentimi i plotë i provave për të përcaktuar nëse shkak i shpërthimit ka qenë një rrjedhje gazi natyror. Hetimet pritet të vazhdojnë duke përfshirë analiza teknike dhe ekzaminime të materialit të mbledhur nga vendngjarja për të vendosur shkakun përfundimtar të ngjarjes.
