Prokuroria e Tiranës ka vendosur të pushojë çështjen penale ndaj tifozëve shqiptarë që më 28 gusht sulmuan dhe dëmtuan tre autobusë me tifozë të skuadrës polake Jagiellonia. Ngjarja ndodhi pas një ndeshjeje verore të Jagiellonia-s me Dinamon, e luajtur në Tiranë dhe mbyllur 1-1. Para sfidës, tifozët polakë kishin kryer gjeste fyese pranë bustit të Heroit Kombëtar Skënderbeu në sheshin qendror, dhe videot e fotot me shprehje si “Kosova është Serbi” u përhapën në rrjet, duke nxitur reagime nga tifozë të skuadrave të kryeqytetit.
Sipas reportazhit të gazetares Anila Hoxha, pas hetimeve paraprake prokuroria nuk ka gjetur prova të mjaftueshme dhe ka pushuar hetimet dhe akuzat për pesë të proceduarit. Më parë, forcat “Shqiponja” arrestuan dhe dërguan për procedim penal Shendi Sata, Ardit Mancellari, Kevin Spahiu dhe të miturit E. H. dhe N. A., si të përfshirë në sulmin ndaj autobuzëve në rrugën e Rinasit.
Dosja hetimore përmban deklarime të protagonistëve që prokuroria i konsideron diskrete dhe të kufizuara. Nga pjesë e dosjes citohen deklarimet e të miturve N. A. dhe E. H., të cilët, në prezencë të familjarit, avokates dhe psikologut, shpjeguan se rreth orës 21:00 ndodheshin pranë stacionit të trenit në Tiranë me disa shokë dhe më pas ishin nisur për të bërë një foto në autostradën Tiranë-Durrës, ku u bashkuan me një grup djemsh të lagjes. Ata thanë se nuk e dinin si u gjendën më pas në rrugën e Rinasit, përballë universitetit EPOKA, ku takuan tifozët e Jagiellonia-s.
Sipas deklarimit të shtetasit Nazif Aga, ai u gjend në një rrëmujë që nuk e kishte pritur dhe deklaroi se nuk kishte goditur apo fyer ndonjërin nga tifozët, duke pohoar se kishte parë rreth 20 persona që hodhën gurë dhe sende të forta ndaj autobuzave. Ai deklaroi se nuk arriti të njohë kryesit dhe se përpiqej të shmangte të marrë mbi vete gurët ose sendet që binin mbi autobuzet e tifozëve të Jagiellonia-s.
