Gazetari Bledi Mane thotë se u rrethua dhe u sulmua gjatë protestës së vetshme “Revolucionit Flamingo” pranë Kuvendit, ku në pamjet e incidentit dëgjohen edhe ofendime, përfshirë thirrjen “servili i Ramës”. Një ditë pas ngjarjes, në një postim në Instagram, Mane dha versionin e tij duke thënë se, përveç vezëve, është goditur edhe me një gur të vogël në pjesën e pasme të kokës dhe se ishte ndjekur nga rreth 30 persona.
Sipas tij, incidenti ndodhi rreth orës 16:00 të 5 tetorit, teksa po ecte në rrugën “Abdi Toptani”. Mane thotë se u detyrua të ndalojë për t’i pyetur “çfarë kishin me mua personalisht”, por turma filloi në kor të shante, të fyente dhe të kërcënonte në mënyrë të organizuar. Ai pretendon se mes protestuesve ishin edhe të mitur dhe se disa prej tyre i kërkonin llogari për mënyrën se si ushtron profesionin dhe për qëndrimet që shpreh në televizion apo në rrjetet sociale, duke i orientuar se si duhet të bëjë gazetari, çfarë të shkruajë dhe si të flasë në televizor.
Mane e konsideron incidentin një sulm për shkak të punës dhe qëndrimeve publike. Në reagimin e tij ai akuzon personat Arlind Qori dhe Agron Shehaj se paguajnë persona për akte të tilla, pa paraqitur prova për këtë pretendim. Ai shprehu se asnjë individ apo turmë, sado e paguar, nuk mund t’i ndalë gazetarët në misionin e tyre dhe bëri thirrje që gazetarët të vazhdojnë punën dhe të mos tremben nga kërcënimet.
Në reagimin e plotë, Mane thekson se u përballua “pa pasur frikë e pa ikur me vrap” dhe vlerësoi mbështetjen e organizatave të gazetarëve, mediave, kolegëve, miqve, policisë së shtetit dhe trupit diplomatik të akredituar në Shqipëri, të cilët sipas tij ishin pranë tij dhe treguan solidaritet. Ai u bëri thirrje kolegëve gazetarë të vazhdojnë punën pavarësisht kërcënimeve.
