Përfaqësuesja e San Marinos arriti të gjejë rrugën e rrjetës për herë të parë pas pesë përballjesh me Albaninë që ishin përfunduar pa gola. Megjithatë, edhe pas shënimit të parë nga mikpritësit, diferenca historike në golaverazhin mes dy përfaqësueseve mbetet e thellë: në gjashtë duele të luajtura deri tani, bilanci është 18 gola për Shqipërinë dhe një për San Marinon.
Me këtë zhvillim, rekordi negativ që më parë i përkiste San Marinos u transferua te një tjetër principatë. Lihtenshtejni mbetet tani e vetmja kombëtare që është përballur më shumë se një herë me Shqipërinë dhe ende nuk ka arritur të vendosë një gol ndaj saj. Ndër katër takimet mes Shqipërisë dhe Lihtenshtejnit, Shqipëria ka shënuar katër fitore dhe ka ruajtur portën e paprekur, me një golavarazh të pandryshuar 9-0.
Arkiva e kombëtares shqiptare përmban edhe shembuj të tjerë skuadrash që kanë dalë pa shënuar kundër mbrojtjes së kuqezinjve, por këto raste janë kryesisht përballje të vetme historike. Gibraltar, Irani dhe Uzbekistani figurojnë me nga një humbje të ngushtë 1-0 në përballjet e tyre të vetme me Shqipërinë. Vietnami është regjistruar me një disfatë më të thellë 5-0 në përballjen e tyre të vetme.
Ekziston gjithashtu një grup i vogël përballjesh që përfunduan pa gola, ku kundërshtarë si Kameruni, Kuba dhe Maroku nuk arritën të shënonin, por as nuk pësuan, duke përfunduar në barazime 0-0 në takimet e tyre të vetme ndaj Shqipërisë.
Pas shënimit nga San Marino, Lihtenshtejni konfirmohet si i vetmi rival që, në përballjet e zhvilluara deri tani, nuk ka arritur të gjejë rrugën e rrjetës kundër kombëtares shqiptare.
