Lionel Messi vazhdon të sfidojë ligjet e kohës dhe të rishkruajë historinë e futbollit me një arritje të paprecedentë në Kupën e Botës. Me golin kundër Egjiptit, kapiteni argjentinas u bë lojtari i parë në histori që shënon në gjashtë ndeshje radhazi të fazës me eliminim direkt në këtë kompeticion. Në moshën 39-vjeçare, numri 10 dëshmoi sërish se është njeriu i momenteve të mëdha, atëherë kur topi peshon më shumë, ndërsa seria e tij, e nisur në edicionin e Katarit, vazhdon të mbahet e gjallë edhe në këtë Botëror.
Viktimat e kësaj ecurie rekord janë Australia (2022), Holanda (2022), Kroacia (2022), Franca (2022, Finale), Kepi i Gjelbër (2026) dhe Egjipti (2026). Me golin e fundit, Messi theu zyrtarisht rekordin e mëparshëm prej pesë ndeshjesh radhazi me gol në fazën “nokaut”, një rekord që mbahej më parë nga emra mitikë të futbollit si braziliani Leônidas, hungarezi György Sárosi dhe braziliani tjetër Vavá.
Kjo seri e jashtëzakonshme thekson jetëgjatësinë e tij në majën e futbollit botëror dhe aftësinë për të qenë vendimtar kur marzhi i gabimit është zero. Në atë që po konsiderohet gjerësisht si “vallja e tij e fundit”, Messi po sigurohet që të lërë pas një trashëgimi dhe numra që ndoshta nuk do të thyhen kurrë. Top Channel
