Kryetari i Partisë Demokratike, Sali Berisha, në mbledhjen e përjavshme me gazetarët u ka bërë thirrje mediave që të mos e thërrasin kryeministrin Edi Rama në studio.
Berisha paralajmëroi se nëse kjo ndodh, atëherë para çdo televizioni simpatizantët e Partisë Demokratike do të protestojnë.
Sipas ish-kryeministrit Rama e ka për detyrë të japë shpjegime në Parlament dhe jo në studio televizive.
Kudo që të shkojë, dje ishte fillimi, po kudo që të shkelë ne do bëjmë protesta gjatë gjithë kohës. Ne nuk na vjen mirë, nuk merret ky. Është njësoj si të merrni në studio një kriminel që nuk shkon para drejtësisë. Çfarë duhet t’i jepni këtij hapësirë, Thirrje mediave, asnjë hapësirë, bojkotoheni. Ky po bojkoton parlamentin detyrën qeverinë, po pse të vijë ky të marrë kohën e qytetarëve. Valët janë të publikut, nuk janë të televizionit. Keni mëshirë ndaj publikut”, tha Berisha.
Ndërkohë kujtojmë se mbrëmjen e djeshme kryeministri Edi Rama ishte i ftuar në emisionin “Opinion”. Ishin të rinjtë e FRPD-së ata të cilët para ambienteve të televizionit bllokuan rrugën, duke bërë që kryeministri Rama të futej në studio nga hyrja e pasme e televizionit.
