Bashkimi Europian miratoi një paketë prej 20 sanksionesh ndaj Rusisë, pasi Hungaria dhe Sllovakia hoqën veton e tyre pas zgjidhjes së një mosmarrëveshjeje me Ukrainën lidhur me tubacionin e naftës Druzhba. Paketa godet të ardhurat nga energjia, ushtrinë, tregtinë dhe shërbimet financiare, përfshirë edhe aktivitetet me kriptovaluta, duke u shtuar masave kufizuese më të ashpra ekonomike që synojnë sektorët kryesorë që mbështesin luftën ndaj Ukrainës.
Elementi kryesor dhe më i diskutueshëm i paketës, ndalimi i plotë i ofrimit të shërbimeve detare për cisternat që transportojnë naftë ruse, është lënë për momentin pezull dhe pritet të koordinohet me vendet e G7. Masa e propozuar synon të ndalojë kompanitë evropiane të ofrojnë shërbime si sigurimi, transporti detar apo akses në porte për anijet që transportojnë naftë bruto ruse, që sipas mbështetësve do të godasë drejtpërdrejt aftësinë e Rusisë për të shitur naftë.
Suedia dhe Finlanda kanë shprehur mbështetje të fortë për ndalim të tillë, duke argumentuar se do të rritej kostoja për sektorin energjetik rus, do të kufizohej përdorimi i dokumenteve të falsifikuara dhe do të lehtësonte kontrollin për kompanitë evropiane. Nga ana tjetër, disa vende anëtare si Greqia dhe Malta kanë shfaqur rezerva dhe kanë paralajmëruar se një ndalim i pa koordinuar ndërkombëtarisht mund të kishte pasoja të dëmshme për ekonomitë e tyre, të rrisë konkurrencën nga vende si Kina dhe India dhe të forcojë së bashku me të ashtuquajturën “flotë në hije” të Rusisë, pra anije të përdorura për të shmangur sanksionet perëndimore.
Vendimi i fundit i Bashkimit Europian vjen pas zgjidhjes së mosmarrëveshjes mbi tubacionin Druzhba që kishte penguar konsensusin dhe pason një sërë masash të tjera kufizuese duke synuar të dobësojë kapacitetin financiar dhe ushtarak të Kremlinit pa përmbyllur ende diskutimin për ndalimin e shërbimeve detare në koordinim me partnerët ndërkombëtarë. Top Channel.
