Altin Meçaj, banor i fshatit Vjosë në njësinë administrative Cakran dhe emigrant në Gjermani, deklaroi para mediave përpara Prokurorisë në Fier lidhur me një ngjarje që pretendon se ndodhi rreth gjashtë muaj më parë. Ai thotë se së bashku me babain e tij, Ylli Meçaj, u dhunuan në banesën e tyre nga disa persona, përfshirë një polic të operacionales në Drejtorinë Vendore të Policisë Fier. Meçaj njoftoi se disponon fakte të reja, por sipas tij Prokuroria ende nuk e ka thirrur për të dhënë dëshmitë dhe provat që pretendon t’i ketë.
Ai deklaroi gjithashtu se personi që, sipas tij, është i përfshirë në ngjarje është rikthyer në radhët e Policisë së Shtetit. Para gazetarëve Meçaj tha: “Kam fakte të reja. Nëse shteti nuk e zgjidh këtë çështje, atëherë do të detyrohem ta zgjidh vetë me metoda të tjera.” Në fjalën e tij ai bëri një krahasim me ngjarje të rënda të së kaluarës, duke përmendur rastin në Libofsh në vitin 1992, dhe paralajmëroi se mosveprimi i institucioneve mund të sjellë pasoja të rënda. Meçaj i bëri thirrje organeve të drejtësisë të ndërhyjnë sa më shpejt dhe të zbardhin ngjarjen.
Deri tani nuk ka pasur një reagim zyrtar nga Prokuroria e Fierit apo nga Policia e Shtetit lidhur me pretendimet e Meçajt. I pyetur, kryeprokurori i Fierit, Helion Mustafaj, ka pohuar se çështja është nën hetim dhe po trajtohet me përparësi.
