Mbipopullim, mungesë personeli dhe kushte denigruese përshkruhen si panorama e Institucionit të Ekzekutimit të Vendimeve Penale (IEVP) në Shënkoll të Lezhës, ku trajtohen personat ndaj të cilëve është caktuar masa e mjekimit të detyrueshëm. Alarmin për gjendjen e këtij institucioni e ngriti Avokati i Popullit pas një inspektimi, duke konstatuar se numri i personave të akomoduar është rreth dyfishi i kapacitetit. Sipas gjetjeve, mungesa e kushteve dhe e stafit mjekësor cenon rëndë trajtimin dhe të drejtat e të shtruarve.
Avokati i Popullit i bëri thirrje menjëherë Ministrisë së Drejtësisë dhe Ministrisë së Shëndetësisë që të ndërhyjnë për përmirësimin e situatës, duke cilësuar gjendjen si të papranueshme. Komisionerët pranë Avokatit të Popullit kërkuan që IEVP Shënkoll të funksionojë si një strukturë e mirëfilltë spitalore, me infrastrukturën, personelin dhe standardet e nevojshme për trajtimin e personave me masa mjekësore.
Institucioni i Shënkollit mori funksionin e trajtimit të personave me masa mjekësore pas mbylljes së institucioni të Zaharisë në Krujë. Megjithatë, Avokati i Popullit vë në dukje se problematikat e evidentuara prej vitesh vazhdojnë të mbeten të pazgjidhura. Shqetësimet për kushtet në këtë institucion ishin përmendur edhe në raportin vjetor të vitit të kaluar të Avokatit të Popullit, por deri më sot nuk është ndërmarrë asnjë masë konkrete për përmirësimin e tyre.
Raporti dhe inspektimi evidentojnë si çështje kryesore mbipopullimin, mungesën e personelit mjekësor të mjaftueshëm dhe kushtet që përshkruheshin si denigruese. Kërkesa e institucioneve të mbrojtjes së të drejtave është që IEVP Shënkoll të pajiset dhe organizohet sipas standarteve spitalore, për të garantuar trajtim të denjë dhe respektim të të drejtave të personave të detyruar të trajtohen mjekësisht.
