Author: Editor

Investigim nga Timoni.al

Në vetëm tre vite në krye të Agjencisë Kombëtare të Ujësjellës-Kanalizimeve (AKUM), drejtori Klevis Jahaj ka nënshkruar kontrata me vlera marramendëse, që sipas një investigimi të portalit Timoni.al kanë përfituar një rreth të ngushtë oligarkësh të lidhur me pushtetin.
Ndërkohë që qytetarët e thjeshtë përballen çdo ditë me mungesën e ujit të pijshëm dhe me fatura që rriten në mënyrë të pashpjegueshme, AKUM ka shpërndarë miliona euro për projekte në fshatra turistikë dhe resorte luksoze.

Burime pranë institucionit pohojnë se çdo vendim për investime, emërime dhe tendera është centralizuar nën kontrollin e plotë të Belinda Ballukut dhe Klevis Jahajt, me qëllim që çdo projekt të kalojë nëpërmjet një piramide politike dhe financiare. Deri më tani, ata kanë marrë nën administrim 11 drejtorë rajonalë të ujësjellësve, ndërsa Ujësjellësi i Tiranës mbetet e vetmja strukturë që ende nuk është vendosur nën këtë kontroll – por edhe kjo duket vetëm çështje kohe.

💥Milionat që rrjedhin me tendera!

Sipas dokumenteve të siguruara nga portali Timoni.al, vetëm në tre muaj, duke filluar nga nëntori 2024, Jahaj ka firmosur tendera me vlerë mbi 8 milionë euro, kryesisht për projekte që shërbejnë interesat e investitorëve strategjikë dhe jo të komuniteteve lokale.
• 4 nëntor 2024: AKUM nënshkroi kontratën për ndërtimin e ujësjellësit në fshatrat Drenovë, Belishovë, Belistan dhe Visokë në Bashkinë Mallakastër.
Vlera e kontratës me TVSH ishte 422 milionë lekë (rreth 4.3 milionë euro). Fitues doli kompania “SENKA”, e lidhur më herët me projekte të tjera infrastrukturore të dyshimta në jug të vendit.
• Nëntor 2024: një tjetër tender prej 2.2 milionë eurosh u dha për rikonstruksionin e ujësjellësit në Gjirin e Lalëzit – një zonë e mbushur me resorte private dhe vila luksoze. Fitues rezultoi “KUPA” sh.p.k., ndërsa projekti justifikohet me “përmirësim të rrjetit ekzistues”, por në fakt shërben për t’u çuar ujë komplekseve turistike.
• Tenderi i radhës lidhet me disa fshatra në Skrapar: Prokuc, Kalluc dhe Bregas, ku është firmosur një kontratë me vlerë 1.7 milionë euro për furnizimin me ujë. Fitues është bashkimi i operatorëve “NG STRUCTURES” dhe “G.P.G. COMPANY”, që sipas dokumenteve duhet ta përfundojnë projektin në vetëm 4 muaj – katër herë më shpejt se afati i zakonshëm 12-mujor, një tregues tipik i tenderave të paracaktuar.

💥Uji për oligarkët, faturat për qytetarët!

Ndërsa resortet e Gjirit të Lalëzit dhe zonat turistike të jugut furnizohen me ujë 24 orë në ditë, qytetarët e Mallakastrës, Skraparit, apo fshatrave të Korçës vuajnë mungesën e plotë të ujit të pijshëm. Faturat rriten, rrjetet rrjedhin, por paratë publike shkojnë në projektet që i shërbejnë “miqve” të pushtetit.

Ekspertët e fushës paralajmërojnë se “reforma e ujit” po shndërrohet në një mekanizëm abuzimi me fondet publike, ku përfitues janë vetëm disa kompani të privilegjuara që sigurojnë tenderat njëri pas tjetrit, pa konkurrencë reale.

Biznesmeni i njohur Behgjet Pacolli implikon zv/kryeministren Belinda Balluku në një tjetër aferë, pas asaj 50 mln euro të tunelit të Llogarasë, për të cilën është zyrtarisht e pandehur nga SPAK, për abuzime me tenderat.

Gjatë intervistës me gazetarin Blendi Fevziu, Pacolli ka zbuluar detaje nga takimi që ka zhvilluar me përfaqësues turq në zyrën e zv/kryeministres dhe ministres së Infrastrukturës, Belinda Balluku, lidhur me koncesionin e aeroportit të Vlorës.

Pacolli tha se gjatë takimit ishte ndjerë i fyer nga sjellja e saj. Gjatë bisedës, rrëfen Pacolli, zv/kryeministrja ishte shfaqur shpërfillëse ndaj tij, ndërsa dukshëm kishte favorizuar investitorët turq. Pacolli tregon se Balluku i kërkoi turqve të merrnin tenderin e ndërtimit të aeroportit të Vlorës.

Belinda Balluku është e pandehur nga SPAK për aferën 50 milionë euro të tunelit të Llogarasë, çështje që ka tronditur qeverinë dhe ka hapur debat mbi mënyrën si jepen koncesionet dhe tenderat publikë, dukshëm fituesit janë të paracaktuar, siç zbulohet edhe nga mesazhet e Belinda Ballukut me ish-vartësin e saj, Evis Berberi dhe dëshmia e biznesmenit Behgjet Pacolli.

Aeroporti i Vlorës duket një tjetër tjetër aferë në horizont për Prokurorinë e Posaçme, me protagoniste sërish zv/kryeministren Belinda Balluku.

Behgjet Pacolli: Marr një telefonatë nga një person në Turqi, të cilin unë e kisha njohur herët në Kazakistan, një i ashtuquajtur Hyseni që më thotë: “Zoti Behgjet unë jam ai” dhe më bie ndërmend kush ishte. Ai më tha se kishte marrë një telefonatë nga Presidenca turke që të udhëtonte në Shqipëri me dy detyra. E para ishte që të ndërtonte një spital dhe e dyta për një aeroport që ata mund të ishin bashkëfinacues. I them: “Pse jo. Është në rregull kjo që të bëhet.

Unë isha më pas në një event në Kazakistan ku ishte dhe ai dhe biseduam. E lamë që të bëjmë një takim në Shqipëri. Kam marrë një telefonatë prej tij më pas dhe më tha që kishte lënë një takim në ministrinë e Infrastrukturës në Shqipëri dhe më pyeti nëse mund të vija dhe unë. Dhe unë shkova. Ishte një ditë me shi.

Blendi Fevziu: Pse ju duhej një partner kur ju keni eksperiencë në ndërtimin e aeroportit të Astana, Tolumbador, dhe disa aeroporte. Ju keni ndërtuar aeroporte më të mëdha se i Vlorës, pse ju duhej kjo kompani?
Behgjet Pacolli: Sepse e kërkonte kontrata e koncesionit, një firmë menaxhuese. Ne nuk e kemi një firmë menaxhuese të dedikuar për atë.

Blendi Fevziu: Por ju kishit firmën e Mynihut firmë menaxhuese…
Behgjet Pacolli: Po, por gjatë kohës u interferua ky person. Më thërrasin dhe unë shkoj në Shqipëri atë ditë…

Blendi Fevziu: Informacioni ju vjen përmes Presidencës së Turqisë?
Behgjet Pacolli: Ai ashtu më flet, përmes Presidencës së Turqisë, që duhet të shkoj në Shqipëri.

Dhe unë atë ditë vonohem pak në trafik dhe ai më pret para Ministrisë. Unë as e kam ditur cila ndërtesë ishte e Ministrisë së Infrastrukturës. Personi që ishte me mua më çon aty dhe e takojmë këtë person në fund të shkallëve.

Hymë brenda dhe ai u ul përballë ministres. Unë mbeta në një anë tjetër. Unë shihja në fytyrë vetëm turkun dhe shpinën e ministres gjithë kohën. Kuptova që ministrja i propozoi që të marrë pjesë në këtë tender. Ajo i propozoi që të ishin bashkë-financues. Unë në një moment ju them: “Ju jeni duke bërë muhabet. Unë po shkoj. Po e pres këtë mikun tim poshtë në restorant. Përshëndetem me ta dhe dal. Të them të drejtën isha pak i fyer. Ishte hera e parë që shkoj diku dhe dikush nuk më konsideron.

Megjithatë turku erdhi në restorant dhe më tha se do të merrte 60%. I thashë dakord, por unë do të rivlerësoja nëse ia vlente të hyja në minorancë në këtë investim apo jo. Kam folur me kompaninë dhe isha i bindur që të mos hyja në këtë investim. Duke u kthyer në Kosovë, turku më telefonon dhe më thotë që unë do të kisha 60% dhe ata 40%. Megjithatë marrëveshja ishte që 2% i merrte Valon Ademi ndaj në fund ramë dakord që unë të kisha 58%, turqit 40% dhe Valon Ademi 2%.

Blendi Fevziu: A ka patur një marrëveshje xhentëlmenësh, një nënshkrim paraprak, ose edhe me gojë mes jush dhe zotit Ademi që ai do të ngjitej në kuotat e 49% nëse turqit do të tërhiqeshin? Sepse zakonisht, këto konsiderohen kontrata me letra, pra turqit marrin pjesë për letra…
Behgjet Pacolli: Kalojnë disa javë dhe ne fillojmë të përgatitemi, kontaktojmë institucionet financiare kush mund të bëjë diçka dhe ne i ftojmë turqit që të vijnë dhe të bëjmë takimin e parë për të ecur përpara. Por ne marrim një letër prej tyre ku na thonë se nuk kemi mundësi për të marrë pjesë në këtë koncesion. Nuk jemi të interesuar të investojmë, thonë dhe a mundemi të tërhiqemi. I them si të tërhiqeni se keni dhënë letrat, certifikatat për këtë investim… Ata thonë se nuk mundemi se kemi ndërtuar edhe një spital dhe jemi zhgënjyer pa katy për arsye se Presidenca turke na ka premtuar se do të na japë mjetet dhe na i ka vonuar pagesat.

Blendi Fevziu: Ai ka folur edhe për takimin e muajit korrik me Ramën në zyrën e këtij të fundit ku e pranishme ishte edhe zv.kryeministrja Belinda Balluku. Pacolli mohoi që në këtë takim të kishte pasur përplasje me Ramën ndërsa pranoi tensionin me Ballukun.
Behgjet Pacolli: Ai takim ka qenë i thirrur nga kryeministri. Unë kam shkuar me vëllain tim. E kam informuar kryeministrin për mbarëvajtjen e punëve. Problem ka qenë një hangar, për të cilin një firmë italiane insiston që ne ta bëjmë sa më shpejt që ata ta shfrytëzojnë për shërbimet e avionëve.

Por ai hangar është jashtëzakonisht i kushtueshëm sepse duhet të hyjnë dy aeroplanë të mëdhenj dhe kostoja e tij është diku mbi 20 milionë. Aty i thashë kryeministrit se hangari do të bëhet, por duhet të ketë durim sepse ne nuk mund ta përballojmë tani.

Tension me Ballukun në mbledhje? 

Behgjet Pacolli: Ka pasur një rast. Ajo ka kërkuar zbatimin e marrëveshjes dhe përfundimin në kohë të punimeve dhe mua ma lëshoi një fjalë se nuk ka mbajtur dot premtimin përballë italianëve për hangarin. Unë i kam thënë që hangari do të bëhet, por unë nuk mund ta marr përsipër edhe këtë investim. Ishte dhe momenti kur unë kisha mësuar për këtë skandalin që më ka bërë partneri tjetër.

Askush në atë takim nuk është marrë me përqindjen e aksioneve. As Rama, as Balluku. Absolutisht jo, por në atë kohë unë e kam informuar se ka ndodhur një gjë e tillë. Më kanë thënë se transferimi i aksioneve duhej të bëhej me lejen e Ministrisë që ajo drejton. Ajo leje nuk është dhënë asnjëherë.

Dola i nervozuar? Jo. Atë ditë kam qenë edhe i sëmurë. Kam pasur tension të lartë të gjakut. E kam lënë vëllain të bisedojë aty dhe kam dalë poshtë. Kam pritur sepse nuk po e gjeja makinën në moment. Kam marrë dy tabletat e mia që i mbaj në makinë. Ky ka qenë shqetësimi”.

Një aksident i rëndë në vendin e punës është regjistruar sot, më 7 nëntor 2025, në zonën Perlat–Shebe të Mirditës, ku kompania turke “Tete Albania” po ushtron aktivitet minerar në mënyrë të paligjshme, megjithëse leja e saj minerare është në proces revokimi nga Ministria e Industrisë dhe Energjetikës.

Burime nga terreni bëjnë me dije se një punëtor është plagosur rëndë gjatë procesit të shpimit në zonë dhe është transportuar me urgjencë drejt spitalit të Mirditës. Megjithatë, Policia e Qarkut Lezhë dhe institucionet përkatëse po mbajnë të fshehtë ngjarjen, duke mos dhënë asnjë informacion publik mbi identitetin e punëtorit apo rrethanat e aksidentit.

Kompania “Tete Albania”, e cila prej afro katër javësh ka pezulluar punën në minierën e Spaçit për shkak të grevës së minatorëve, duket se ka zhvendosur aktivitetin e saj në zonën Perlat–Shebe pa vendim të Këshillit Bashkiak të Mirditës dhe pa respektuar asnjë kriter të sigurisë teknike.

Sipas banorëve të zonës, kompania ka vendosur sonda kërkimi dhe ka hapur rrugë të tëra pa asnjë leje ndërtimi, duke dëmtuar pyjet dhe mjedisin përreth. Ndërkohë, institucionet shtetërore heshtin, ndërsa policia, që së fundmi po zhvillon aksione kundër ndërtimeve pa leje, nuk ndërhyn ndaj kompanive minerare që operojnë në shkelje të ligjit.

Ngjarja në fjalë ngre sërish dyshime të forta për lidhje të korrupsionit institucional dhe për trajtimin selektiv të ligjit, ku kompanitë e mëdha të huaja mbeten të paprekshme, ndërsa qytetarët e zakonshëm ndëshkohen për çdo shkelje minimale.

Një nga rrjetet më të mira investigative evropiane, ‘Follow the Money’ (Ndiq Paranë) me qendër në Holandë, sjell një investigim tronditës pikërisht pak pas publikimit të progres-raportit të BE për Shqipërinë.

Ndër të tjera, në shkrim thuhet se në përgjimet e policive evropiane gjendet emri i Taulant Ballës për lidhje me bandat e drogës.

“Në fillim të vitit 2025, Taulant Balla, gjithashtu ish-ministër i Brendshëm dhe atëherë ministër i shtetit për marrëdhëniet me parlamentin, u përfshi në telashe për shkak të korrupsionit të dyshuar.

Gjatë kohës si ministër, ai ishte gjithashtu udhëheqësi politik i Partisë Socialiste për diasporën dhe përgjegjës për përfaqësimin e interesave të shqiptarëve jashtë vendit. Me 2.5 milion shqiptarë që jetojnë jastë, vendi ka thuajse po aq njerëz jashtë kufijve sa brenda.

Punonjësit e Ballës u kapën duke ofruar rreth 60 euro për votat e shqiptarëve në Britaninë e Madhe. Në shërbimet policore evropiane, Balla njihet: emri i tij u shfaq gjatë një hetimi global për rrjetin e komunikimit SKY EÇ. Kjo operacion, i udhëhequr nga disa shërbime policore evropiane, synonte të ndërpriste telefonat satelitorë të koduar që përdornin kriminelët për të komunikuar në mbarë botën.

Kur autoritetet fituan qasje në biseda, panë që Balla ishte në kontakt me trafikantë droge,” shkruan media investigative.

Berisha deklaroi:

Unë po të garantoj që nuk kam shprehur këtu, për arsye kohe dhe të tjera, as dyzet përqind të asaj që ky ligj përfaqëson.
Sepse ky ligj zotëri, me ndryshimin e fundit, bën fjalë për përkatësi të shumëfishta.
Bën fjalë për diversitete të gjëra identiteti.
Dhe identiteti me diversitete të gjera, e kupton vetë, se jam burrë, nuk jam burrë, jam grua, nuk jam grua.
Unë them atë që ekspertët e të drejtës evropiane kanë shkruar. Në asnjë nen të direktivës evropiane nuk bëhet fjalë për përkatësi të shumëfishtë gjinore, as për identitete gjinore me spektër të gjerë.
I ka thënë një përgjigje shumë të qartë Gjykata Europiane të Drejtave të Njeriut, Gjykata Kushtetuese franceze, e cila ndaloi në vitin 2016 në një gjykim pranimin e gjinisë neutrale.
Që gjinia neutrale është shumë më pak, se këtu bëhet fjalë për diversitet, bëhet fjalë për dërgimin e qenies njerëzore gjer në kafshi, gjer në poligamizëm, gjer në poliandrizëm.
Për çdo familjar që i lexon këtu, këto përkufizime heqin çdo lloj arritje në trashëgiminë shekullore të konsolidimit të familjes.
Po, shoqëria ka qenë poliandrike, poligamike, përsëri sot ka disa fise të tilla afër Himalajave, por shoqëria e civilizuar ka evoluar në statusin binar, biologjik binar, atë që ka dhënë Zoti dhe që e ka konsoliduar në shekuj.
Këtu nuk po e ekzagjeroj fare.
Se nëse hyn më shumë, ligji përmbys gjithçka.
Është atentati më i rrezikshëm që është bërë ndaj qenies njerëzore.
Tejkalon doktrinën e Marksit, është post-marksiste.
Ata që po protestojnë aty, nuk do mund të lexojnë më Kuranin.
Në qoftë se ata nuk pranojnë përkatësinë e shumëfishtë, në qoftë se ata nuk pranojnë gjininë në diversitetin e gjerë të saj, ata dënohen aty.
Mirëpo ata në libra kanë të shkruar gjininë burrë dhe grua.
Është shumë, shumë e vërtetë.
Këta nuk flasin më as për gjininë neutrale.
Këta flasin për përkatësi të shumëfishtë. Pra jo të dyfishtë, që është e sanksionuar në Kushtetutë, e sanksionuar në Kodin e Familjes, e sanksionuar në të gjitha kodet.
Kjo përmbyset.
Ligji vendos censurën e plotë mbi besimet fetare duke mos i lejuar të shprehen.
Por në themel të Biblës dhe Kuranit janë vlerat e shenjta të familjes dhe të njeriut.
Nuk është e vërtetë.
Mos i pranoni të tilla.
Ata edhe disa vërejtje që morën parasysh, i kanë rikthyer.
Por ata mbrëmë në një rast të pazakontë, afër mesnate lëshuan një deklaratë ku thuhej se fotografia që kishte publikuar Taulant Balla me qëllim mashtrimin ishte një fake.
Se është një goditje shumë e rëndë e lirisë së fjalës.
Sepse nëse thua se ka dy gjini, gjobitesh.
Sepse nëse kërkon nga shkolla që fëmija im është vajzë, ti dënoheh sepse ata do i japin hormone, do bëjnë gjithçka ta nxisin të ndryshojë gjininë.
Ky është ligji faktiksht i përmbysjes së një shoqërie dhe ideoliogjimit të saj me doktrinën e ekstremit të majtë.
Doktrinën më të zezë që ekziston sot në botë.
Ambasadorit të BE i them kaq, zotëri ne absolutisht ne respektojmë orientimin seksual të gjithsecilit, por përpjekjet tua për t’i imponuar shoqërisë shqiptare standarde të përkatësisë së shumëfishtë gjinore, të gjinisë në diversitet të gjerë, përveç asaj binare, dhe i them këtu, edhe në statusin tënd je binar.
Nuk merremi ne me trajtimin, ka fëmijë, ka pasur grua, ka marrë vendimet e tij më pas, siç e ka shpjeguar, se nuk dua të merrem me jetën e tij personale fare.
Kështu që ligji nuk ka asgjë të përbashkët.
Le t’u thotë shqiptarëve se cila direktivë e BE bën fjalë për përkatësi të shumëfishtë gjinore.
Të dalë, ta nxjerrë aty.

Skandali i Edi Ramës dhe Belinda Ballukut me tunelin e Llogarasë po bën jehonë edhe në mediat turke. 
Gazeta e njohur e Stambollit, Sözcü, shkruan se një kompani turke ka përfituar 32 milionë euro pa vendosur asnjë tullë.

Më poshtë, një përmbledhje e raportimit.

Zhvillimet që lidhen me tenderin për tunelin e Llogarasë, i cili ndodhet në jug të Shqipërisë, rreth 20 kilometra larg Vlorës, kanë shkaktuar një krizë të re politike në vend. Sipas gazetës shqiptare Politiko, tenderin e zhvilluar në dhjetor 2020 e fitoi kompania shqiptare “Gjoka Konstruksion” me një ofertë prej 140 milionë eurosh, por ai u anulua.

Gjashtë muaj më vonë, tenderi u rihap dhe këtë herë u fitua nga konsorciumi turk “Intekâr Yapı & ASL İnşaat” me një ofertë prej 172 milionë eurosh. Më pas, tenderi iu transferua sërish kompanisë “Gjoka Konstruksion” për 140 milionë euro, pa u kryer asnjë punë konkrete.

Emri i ish-deputetit të Partisë Demokratike, Arbi Agalliu, është vendosur në qendër të vëmendjes pas publikimit të përgjimeve në dosjen “Balluku–Berberi”.

Në bisedat e publikuara, Agalliu përmendet nga ish-drejtori i Autoritetit Rrugor Shqiptar, Evis Berberi dhe nga vetë zëvendëskryeministrja Belinda Balluku, në kontekstin e një komunikimi për dy prona në zonën e Vlorës, njëra pranë bypass-it dhe tjetra në hyrje të autostradës.

Sipas transkripteve të bëra publike, Balluku i kërkonte Berberit që “të dëgjonte” Agalliun, duke e përshkruar atë si “djalë qytetar”, ndërsa Berberi i përgjigjej se “do bindet sepse Agalliu është patriot”.

Në vijim, një bisedë e vetë Agalliut me Berberin konfirmon kontaktin mes palëve për çështjen e pronave në fjalë.

Pas këtyre zhvillimeve në vitin 2022, në zgjedhjet parlamentare të majit 2025, Agalliu mori një vendim të papritur: ai u tërhoq nga gara nën siglën e Partisë Demokratike dhe u ripozicionua si kandidat për deputet në listën e partisë së Dashamir Shehit.

“Kam dhënë dorëheqjen nga Grupi Parlamentar i Partisë Demokratike, që ditën që Gjykata vendosi që vula dhe logo t’i shkojë grupit të rithemelimit. Dhe nga ai moment me kolegët, qytetarët, mbështetësit që besuan te qëndresa jonë, bazuar te tre parime që janë mbështetja pa kushte e sistemit të drejtësisë, mbështetja ndaj ndërkombëtarëve dhe mbi të gjitha kodi zgjedhor për lista të hapura.

Të tre këto shtylla do të përfaqësonin më së miri ato që ne besonim dhe mendonim. Prandaj ne krijuam kohë më parë partinë e re Djathtas 1912 dhe që prej shtatorit të vitit të kaluar, tetorit e më pas, së bashku me LZHK-në e drejtuar nga Dash Shehi, kemi zyrtarizuar tashmë një koalicion ku kemi dorëzuar listat me 186 emra të kandidatëve për deputetë në të 12 qarqet. Unë do të garoj në qarkun e Vlorës”, deklaronte Arbër Agalliu në mars.

Sot që dolën hapur bisedat e tij me emra të qeverisë, ky veprim i tërheqjes nga logoja e PD mund të interpretohet si një përpjekje për të ndarë votat opozitare në qarkun e Vlorës, në një kohë kur kampi opozitar përpiqej të konsolidonte mbështetjen kundër mazhorancës.

Edhe pse Agalliu nuk ka dhënë publikisht një reagim për përmendjen e emrit të tij në dosjen “Balluku”, fakti që ai është përfshirë në komunikime me figura kyçe të qeverisë për interesa personale, dhe më pas ka zgjedhur të kandidojë për një parti të vogël që , ka ngritur pikëpyetje mbi motivet e tij politike.

Kjo lëvizje mund të shihet si një shembull i rrotullimit të figurave politike në funksion të interesave personale, më shumë sesa të bindjeve ideologjike.

Në këtë rast, “dy tokat në Vlorë” nuk janë vetëm çështje pronësie, por edhe simbol i mënyrës se si politika dhe biznesi vazhdojnë të ndërthuren në prapaskenat e pushtetit.