Në Durán të Ekuadorit, qytet i kapur nga droga dhe bandat rivale, kapiteni i policisë Jean Carlos Bustamante thotë se lufta nuk është vetëm kundër kriminelëve, por edhe kundër korrupsionit brenda shtetit dhe politikës: “Ne kemi shumë njerëz të këqij brenda njësisë sonë, brenda shtetit dhe brenda politikës. Ka shumë persona të korruptuar që janë në shërbim të bandave.” Në moshën 34 vjeç ai udhëheq një ekip special që ka përzgjedhur vetë dhe thotë se mund t’u besojë vetëm kolegëve pranë tij. Sipas tij, ata që flasin kundër bandave vriten.
Presidenti Daniel Noboa deklaron se rreth 70% e kokainës që mbërrin në Evropë dhe SHBA kalon përmes Ekuadorit. Droga vjen kryesisht nga Kolumbia dhe Peruja dhe përfshin bashkëpunimin e bandave lokale me kartelet meksikane dhe grupe të krimit të organizuar ndërkombëtar, përfshirë, sipas autoriteteve dhe raportimeve ndërkombëtare, rrjete të mafias shqiptare. Bandat kanë përfituar nga kufijtë e dobët, mungesa financiare e forcave të sigurisë dhe pozicioni strategjik me dalje në Oqeanin Paqësor. Një vend që dikur ishte destinacion turistik është shndërruar brenda pak vitesh në një nga zonat më të dhunshme të Amerikës Latine.
Të dhënat e Ministrisë së Brendshme tregojnë mbi 9,000 vrasje vitin e kaluar, një nga normat më të larta në botë. Presidenti Noboa ka nisur një fushatë të ashpër kundër bandave gjatë dy viteve të fundit, por kritikët thonë se arrestimet e drejtuesve të mëdhenj kanë çuar në copëtim të bandave dhe shfaqjen e grupeve më të vogla dhe më të dhunshme. Shumë banorë dyshojnë se lufta nuk mund të fitoret plotësisht.
Policia përballet edhe me probleme brenda sistemit të drejtësisë. Në operacione, si ai i Bustamantes me dron, zbulohen mikro-trafikantë dhe paketime me drogë “H” që shiten për një dollar. Kolonel Santiago Gavilanes thotë: “Ne i burgosim anëtarët e bandave dhe ata i lirojnë. Disa prej tyre dalin dhe vrasin njerëz të tjerë.” Sipas tij, bandat kanë para për të blerë ligje, gjyqtarë dhe politikanë. Një oficer anonim thotë se është kontaktuar dy herë nga bandat me oferta ryshfeti të mëdha.
BBC takoi edhe një drejtues bande, i identifikuar si “Jonathan”, i cili pretendon se ka katër policë në listën e pagave të tij dhe se përfitojnë sinjalizime gjatë operacioneve; kjo skemë kushton rreth 1,500–2,000 dollarë në muaj. Jonathan thotë se hyri në botën e bandave në moshën 18 vjeç për të mbështetur familjen. Organizatat për të drejtat e njeriut paralajmërojnë se fëmijët po rekrutohen që në moshën 12-vjeçare dhe disa bëhen vrasës me pagesë pas tre vjetësh.
