Autoritetet e Kosovës arrestuan shtatë persona të nacionalitetit serb afër Prishtinës, të mërkurën, nën dyshimet për “kërcënime, presion dhe shantazh” ndaj vullnetit të lirë të votuesve në prag të zgjedhjeve të parakohshme parlamentare. Ministri në detyrë i Punëve të Brendshme, Xhelal Sveçla, njoftoi se arrestimet u kryen në Graçanicë lidhur me këto dyshime, ndërsa Prokuroria Themelore në Prishtinë bëri të ditur se pesë persona u ndaluan për “cenim të vullnetit të lirë të votuesve” në të njëjtën komunë me shumicë serbe.
Arrestimet pasuan akuzat e ministrit në detyrë Nenad Rashiç ndaj Listës Serbe për “presion” dhe “frikësim” ndaj mbështetësve të tij dhe thirrjet që institucionet kompetente të vepronin. Sveçla deklaroi se aktet, sipas tij, burojnë nga direktiva të orkestruara nga Serbia dhe cenojnë pluralizmin politik dhe rendin demokratik. Prokuroria tha se veproi pas raportimeve mediale mbi pretendimet e Rashiçit dhe ka mbledhur deklarata dhe prova që dyshojnë për përfshirje në cenim të vullnetit të lirë të votuesve.
Radio Evropa e Lirë publikuar më 18 maj dëshmi të personave që thanë se u larguan nga puna për shkak se nuk e mbështesin Listën Serbe, por partinë e Rashiçit; ata kishin punuar për dekada në institucionet shëndetësore dhe arsimore që funksionojnë në sistemin e Serbisë në Kosovë dhe që vitet e fundit udhëhiqen kryesisht nga anëtarë të Listës Serbe me mbështetjen e Beogradit. Kryeministri në detyrë Albin Kurti tha se Serbia po frikëson dhe shantazon serbët e Kosovës për t’i detyruar të votojnë Listën Serbe.
Lista Serbe reagoi menjëherë: zyrtari Igor Simiç tha se janë arrestuar drejtorë të institucioneve shëndetësore dhe arsimore dhe e konsideroi veprimin si “integrim të dhunshëm” të këtyre institucioneve, që sipas tij funksionojnë në sistemin e Serbisë. Ai pohoi se arrestimet nuk kanë lidhje me zgjedhjet dhe akuzoi Rashiçin për targetim të serbëve. Rashiç pretendoi gjithashtu se rreth 20 mbështetës të tij janë larguar nga puna dhe se rreth 40 të tjerë mund të pësojnë të njëjtën fat në Graçanicë, dhe se simpatizantë të tij ndalohen në pikëkalimet kufitare nga BIA.
Autoritetet në Serbi reaguan me kritika: Ivica Daçiç paralajmëroi ndjekje dhe sanksione për të gjithë personat që kontribuan në ndalimin e udhëheqësve të institucioneve serbe, ndërsa Petar Petkoviç i njoftoi përfaqësuesit ndërkombëtarë dhe i kërkoi angazhim urgjent, duke cilësuar arrestimet si “rrëmbim të paligjshëm dhe të pabazuar”. REL-i kontaktoi zyrat serbe për sqarime, por nuk mori përgjigje. Në zgjedhjet e 7 qershorit, Lista Serbe do të përballet vetëm me partinë e Rashiçit. /REL/
