Ambasada e Shteteve të Bashkuara në Tiranë i ka bërë thirrje qytetarëve amerikanë të tregojnë kujdes dhe të shmangin zonat ku zhvillohen demonstratat në kryeqytet, në prag të një proteste të paralajmëruar për të shtunën. Sipas njoftimit, protesta në qendër të Tiranës dhe pranë institucioneve qeveritare vazhdojnë dhe disa prej tyre kanë degjeneruar në përplasje të dhunshme, me përdorim të mjeteve ndezëse, hedhje gurësh dhe dëmtime të pronës.
Ambasada paralajmëron se demonstrata të tjera mund të zhvillohen edhe në ditët në vijim, jo vetëm në Tiranë por edhe në qytete të tjera të vendit, dhe se ato mund të përhapen edhe në rrugët përreth. Si pasojë, pritet shtim i pranisë policore, bllokime të qarkullimit, devijime dhe mbyllje të akseve rrugore. Në njoftim theksohet se personat që ndodhen pranë zonave të protestave mund të ekspozohen ndaj gazit lotsjellës, fishekzjarrëve të hedhur në drejtim horizontal, mjeteve ndezëse dhe predhave të gomës. Për këtë arsye, personelit të ambasadës i është kërkuar të shmangë të gjitha zonat ku zhvillohen demonstratat.
Njoftimi përmend gjithashtu mundësinë e mbylljeve të tjera ose kufizimit të shërbimeve publike në Tiranë, përfshirë transportin publik dhe institucionet qeveritare. Ambasada u kërkon qytetarëve amerikanë të shmangin protestat, të jenë të vëmendshëm ndaj mjedisit përreth dhe të ndjekin mediat lokale dhe udhëzimet e autoriteteve. Aty rekomandohet edhe që të kenë gjithmonë një plan emergjence ose një rrugë dalje nga zonat ku mund të ndodhen demonstratat.
