Kryeministri Edi Rama i është përgjigjur organizatës “Reporterët Pa Kufij” pas raportit të tyre mbi lirinë e shtypit, duke argumentuar se të dhënat tregojnë një dominim të zërit opozitar në media. Në reagimin e tij në “X” Rama citon një analizë të një startup-i shqiptar të bazuar në inteligjencën artificiale, që ka monitoruar mbi 4,500 artikuj në 43 media gjatë 66 ditëve. Sipas këtyre të dhënave, zëri i opozitës ishte 3.57 herë më i lartë se ai i qeverisë, me përmendjet e opozitës 1,828 kundrejt 925 për kryeministrin dhe qeverinë së bashku.
Raporti i përmendur evidenton se burimet kritike ishin 4.67 herë më dominuese se ato pro-qeveritare, ndërsa toni kritik ishte 6.4 herë më i fortë se mbulimi pozitiv. Më shumë se 15 figura të opozitës ishin vazhdimisht të pranishme në tituj, dhe në vetë titujt u regjistruan 368 citate të drejtpërdrejta të opozitës kundrejt 108 citate të qeverisë, një dominim 3.4 herë më i madh. Rama përmend gjithashtu se akuzat më të ashpra kundër qeverisë dhe ndaj tij u qarkulluan lirshëm në rreth 70 tituj, ndërsa “nuk ka asnjë provë për ndonjë nivel simetrik sulmesh kundër burimeve mediatike anti-qeveritare, apo edhe kundër kundërshtarëve politikë.”
Ai citon edhe gjetjet e Autoritetit të Mediave Audiovizive (AMA), sipas të cilave opozita mbajti 60.12% të kohës së transmetimit politik televiziv gjatë muajit mars, ndërsa vetë qeveria zuri një pjesë shumë më të vogël. Rama thekson se këto janë “fakte të matshme” dhe jo percepciome, duke argumentuar se në një mjedis me “media të kapur” nuk do të kishte dominim të zërave opozitarë, as mbizotërim të narrativave kritike apo qarkullim të lirë të akuzave ekstreme.
Në reagim ai gjithashtu thotë se shqetësimet për pronësinë e medias dhe kushtet e punës së gazetarëve janë çështje reale që duhet adresuar, por kundërshton paraqitjen e Shqipërisë si vend me media të kapura, duke cilësuar analizën që përfundon me një renditje të anshme si të paplotë dhe të varfër. Në fund shton një koment të shkurtër mbi një teori personale për strategji zgjedhore, dhe ndan lidhje drejt burimit të analizës AI.
