Më 3 shtator Shqipëria ndaloi importin e mishit të gjedhit të shpendëve nga Brazili, pas vendimit të BE që e cilëson mishin brazilian si produkt të pasigurt, pasi dyshohet se tek kafshët e gjallë injektohen antibiotikë të ndaluar nga BE.
Mishi i importuar nga Brazili rrezikon jo vetëm për praninë e antibiotikëve të ndaluar, por edhe për kontaminimin me baktere. Kontrollet e Autoritetit Kombëtar të Ushqimit (AKU) gjatë vitit 2025 identifikuan rreth 14.8 tonë mish pule dhe derri të kontaminuar me Salmonelë, dhe një pjesë e këtyre sasive ishte konsumuar nga qytetarët. Rasti më shqetësues ishte një ngarkesë prej 10,272 kilogramësh (10.27 tonë) fileto pule “Copacol”, ku analizat konfirmuan praninë e Salmonella Typhimurium. Kur inspektorët e AKU-së ndërhynë, 8,949 kilogramë (rreth 8.95 tonë) u gjetën ende në subjekt dhe u bllokuan, ndërsa 1,322 kilogramë (rreth 1.32 tonë) rezultonin të shitur te konsumatorët. Sasia e bllokuar dhe produktet e kthyera nga tregu u dërguan për asgjësim.
Një rast tjetër i evidentuar ka të bëjë me mishin e derrit: në 2025 inspektorët konstatuan 4,516 kilogramë (rreth 4.52 tonë) fileto derri të ngrirë të kontaminuar me Salmonellë. Ndryshe nga rasti i mishit të pulës, e gjithë sasia e mishit të derrit ndodhej ende në magazinën frigoriferike të subjektit dhe nuk ishte shpërndarë në treg; AKU e bllokoi produktin dhe më pas e asgjësoi. AKU raporton gjithashtu se gjatë vitit 2025 mori 17 mostra mishi pule dhe 8 mostra mishi derri.
Në listën e mostrave nuk rezulton asnjë mostër e mishit të gjedhit me origjinë nga Brazili. Kjo ngre pikëpyetje mbi nivelin e kontrollit laboratorik të mishit të gjedhit të importuar nga Brazili, në një kohë kur siguria e produkteve shtazore që vijnë nga ky vend është vendosur nën vëmendje edhe nga autoritetet europiane, të cilët kanë ndaluar importin për një afat të pacaktuar pasi dyshohet përdorimi i medikamenteve veterinare të ndaluara.
