Pas mbytjes së një 7-vjeçareje në ujërat e Drinit të Zi, autoritetet në Dibër kanë shprehur shqetësim për rrezikun që shkaktojnë ndryshimet e menjëhershme të prurjeve të lumit, veçanërisht pas hapjes së portave të digave në territorin e Maqedonisë së Veriut. Ngjarja shtyu drejtuesit vendorë të mbledhin një Task-Force nën drejtimin e Prefektit të Qarkut Dibër, Nexhbedin Shehu, me qëllim forcimin e masave të sigurisë dhe parandalimin e incidenteve të ngjashme përgjatë gjithë rrjedhës së Drinit të Zi.
Në takim u bë fokus mbi nevojën e koordinimit të informacionit lidhur me menaxhimin e ujit. Një prej kërkesave kryesore ishte që pala maqedonase të njoftojë paraprakisht oraret e hapjes së portave të digës së Spiljes në zonën e Dibër të Madhe, në mënyrë që të shmangen surprizat në nivelin dhe rrjedhën e lumit. Shteti vendor kërkoi gjithashtu që operatorët privatë që ushtrojnë aktivitet përgjatë Drinit të Zi të bëjnë publike oraret e hapjes së portave dhe çdo problematikë që mund të ndikojë në rrjedhën e ujit, për ta bërë këtë informacion të aksesueshëm për të gjithë.
Shqetësimi për rritjen e rrezikut u theksua edhe për shkak të rritjes së turizmit në zonë; sipas të dhënave të paraqitura në takim, numri i vizitorëve pranë Drinit të Zi këtë vit është rritur me rreth 50% krahasuar me një vit më parë. Kjo shton nevojën për masa parandaluese dhe për informim më të mirë të publikun, veçanërisht për turistët që frekuentojnë brigjet dhe zonat përreth lumit.
Si masë praktike, në mbledhje u propozua vendosja e tabelave informuese dhe paralajmëruese në akset kryesore që çojnë drejt lumit, me qëllim që qytetarët dhe vizitorët të njoftohen për rrezikun e ndryshimeve të papritura të nivelit dhe rrjedhës së ujit. Kërkesat dhe propozimet i janë paraqitur për t’u ndjekur e koordinuar më tej mes gjithë palëve të përfshira. Top Channel.
