Presidenti i Shteteve të Bashkuara, Donald Trump, deklaroi se nuk ka diskutuar me presidentin e FIFA-s, Gianni Infantino, rreth planit të organizatës për t’u ofruar investitorëve privatë aksione në një kompani të re që do të menaxhojë Kupën e Botës dhe aktivitetet e tjera. Ai foli për gazetarët në Camp David dhe tha se nuk kishte pasur biseda me Infantinon për këtë çështje, pavarësisht marrëdhënies së afërt që ata kanë krijuar pas organizimit të Kupës së Botës 2026 në SHBA.
FIFA njoftoi se synon të krijojë një kompani të re me vlerë rreth 20 miliardë dollarë, e cila do të merret me menaxhimin e të drejtave komerciale të Kupës së Botës dhe turneve të tjera ndërkombëtare. Sipas planit, investitorëve të jashtëm do t’u ofrohen deri në 20% të aksioneve të kësaj strukture të re. Një grup investitorësh i udhëhequr nga një kompani e themeluar nga Joshua Kushner, vëllai i dhëndrit të Donald Trump, Jared Kushner, pritet të jetë pjesë e projektit.
Plani i FIFA-s ka shkaktuar reagime të forta në botën e futbollit, dhe veçanërisht nga UEFA, e cila ka shprehur shqetësime për ndikimin që mund të ketë privatizimi i pjesshëm i aktiviteteve komerciale të organizatës. Kritikat përqendrohen në pasigurinë rreth mënyrës së menaxhimit të të ardhurave dhe rrezikun e ndikimeve të jashtme në aktivitetet e kompeticionet e futbollit ndërkombëtar.
Në përgjigje, Infantino ka mbrojtur projektin duke deklaruar se synon të rrisë të ardhurat për të gjitha federatat anëtare të FIFA-s. Ai ka theksuar se iniciativat nuk përbëjnë një “shitje të futbollit”, por përfaqësojnë një mënyrë të re për menaxhimin e mundësive ekonomike të këtij sporti dhe për të kanalizuar të ardhura shtesë drejt federatave pjesëmarrëse.
