Rruga e Andrea Pirlos drejt pankinës së Kombëtares italiane është bërë çështje që shkon përtej sportit, duke hapur debat etik dhe politik. Ish-mesfushori, kandidati kryesor për drejtimin e “Azzurrëve”, po përballet me kritika për shkak të marrëveshjes si ambasador ndërkombëtar i Fonbet, një kompani ruse bastesh. Kjo zgjedhje ka sjellë pasoja në marrëdhëniet personale dhe në perceptimin publik mbi imazhin e tij si trajner potencial i një institucioni simbol të futbollit italian.
Marrëdhënia mes Pirlos dhe Andriy Shevchenko, ish-shok skuadre te Milani dhe aktualisht president i Federatës së Futbollit të Ukrainës, raportohet se është ftohur ndjeshëm pas angazhimit të Pirlos në aktivitete promocionale në Rusi. Shevchenko ka shprehur hapur pakënaqësinë e tij ndaj Pirlos dhe figurave të tjera të futbollit italian që kanë marrë pjesë në promovime në Rusi, duke deklaruar: “Kam folur drejtpërdrejt me shumë prej tyre dhe kam shprehur qartë kundërshtimin tim dhe qëndrimin e Ukrainës. I dënoj ato që kanë bërë. Ata e kuptojnë, por gjithsesi kanë marrë vendimin e tyre. Duhet të jetojnë me këtë zgjedhje”. Ai ka shtuar se marrëdhënia personale me Pirlon është në pauzë dhe se ndjehet i lënduar: “Për momentin gjithçka është në pauzë. Më ka lënduar”.
Federata Italiane e Futbollit po vlerëson sfidat që dalin përtej aspektit teknik dhe shqetësohet për imazhin që do të sjellë emërimi i një trajneri me një partneritet të tillë. Ndërsa emra si Francesco Totti dhe Marco Materazzi gjithashtu kanë qenë të përfshirë në aktivitete promocionale në Rusi, rasti i Pirlos konsiderohet më delikat për shkak të rolin të mundshëm zyrtar në një institucion të rëndësishëm të futbollit italian.
Përpara se të marrë drejtimin e kombëtares, Pirlo përballet me një sfidë jashtë fushës: menaxhimin e polemikave publike, riparimin e marrëdhënies së dëmtuar me një mik të vjetër si Shevchenko dhe përgjigjen ndaj shqetësimeve lidhur me imazhin e Federatës.
