Forca policore spanjolle zhvilluan një operacion të gjerë në Katalonjë kundër një grupi kriminal të përfshirë në trafikun e armëve, duke arrestuar nëntë persona dhe sekuestruar një arsenal të konsiderueshëm. Aksioni, i kryer nga Mossos d’Esquadra dhe Policia Nacional me rreth 130 efektivë, çoi në hyrjen në disa ambiente të organizatës ku u zbuluan dy depo armësh me më shumë se 40 armë zjarri.
Nga bastisjet u konfiskuan një armë luftarake, 38 pistoleta gjysmëautomatike, dy revolverë, katër pushkë dhe rreth 1.000 fishekë. Po ashtu u kap një granatë dore, një bazukë, jelekë antiplumb, një mburojë balistike dhe 12.000 euro para cash. Autoritetet njoftuan se operacioni pati një koordinim të gjerë dhe u ndërmorën veprime edhe brenda ambienteve të burgut ku ndodhej i dyshuari kryesor.
Hetimet, që kishin nisur në janar, treguan se organizata merrej me blerjen, magazinimin dhe shitjen e armëve, duke përdorur kanale të fshehta për reklamim dhe dërgimin e fotografive te klientët e mundshëm. Sipas hetuesve, kreu i grupit ishte në burg por vazhdonte të koordinonte aktivitetin kriminal dhe t’u jepte urdhra anëtarëve të familjes së tij. Ai komunikonte rregullisht me botën e jashtme dhe negocionte shitjet nga burgu.
Roli i anëtarëve përfshinte familjarë: një nga vajzat e drejtuesit kishte funksionin e promovueses së armëve, duke i fotografuar dhe filmuar për t’i paraqitur blerësve, ndërsa partnerja e drejtuesit merrej me transportin e armëve në vendet e dakorduara për dorëzim. Në kuadër të operacionit kryhet edhe një kontroll brenda burgut ku ishte i dyshuari si organizator.
Të arrestuarit janë pesë burra dhe katër gra, me moshë nga 20 deri në 48 vjeç. Autoritetet spanjolle njoftuan se hetimet vazhdojnë dhe nuk përjashtohet mundësia e arrestimeve të tjera lidhur me këtë rrjet kriminal.
