Një operacion i gjerë policor në Katalonjë goditi një organizatë kriminale të përfshirë në trafikun e armëve, ku u arrestuan nëntë persona dhe u sekuestrua një arsenal i madh. Aksioni, i zhvilluar nga forcat Mossos d’Esquadra dhe Policia Nacional me rreth 130 efektivë, çoi në kontrolle në ambientet e organizatës dhe zbulimin e dy depove të armëve, ku u gjetën më shumë se 40 armë zjarri dhe mbi 1.000 fishekë.
Nga hetimet rezulton se janë konfiskuar një armë luftarake, 38 pistoleta gjysmëautomatike, dy revolverë, katër pushkë, një bazukë, një granatë dore, jelekë antiplumb, një mburojë balistike dhe rreth 12,000 euro para cash. Autoritetet njoftuan gjithashtu për sekuestrimin e pajisjeve të tjera dhe evidencës që lidh aktivitetin e grupit me blerjen, magazinimin dhe shitjen e armëve.
Hetimet tregojnë se organizata drejtohej nga një person që ndodhet në burg, i cili, sipas autoriteteve, vazhdonte të koordinonte aktivitetin kriminal dhe t’u jepte urdhra anëtarëve të familjes së tij. Ai komunikonte rregullisht me botën e jashtme dhe drejtonte negociatat për shitjen e armëve nga brenda qelisë. Në rrjetin e hetuar, anëtarët përdornin kanale të fshehta për të reklamuar armët dhe për t’u dërguar fotografi klientëve të mundshëm.
Roli i familjes u përshkrua konkretisht: një nga vajzat e drejtuesit shërbente si promovuese, duke fotografuar dhe filmuar armët për t’i prezantuar blerësve, ndërsa partnerja e kreut transportonte armët me automjet në vendet e dakordësuara për dorëzimin. Hetimi, që kishte nisur në janar, përfundoi me arrestimin e nëntë personave — pesë burra dhe katër gra, të moshave 20 deri 48 vjeç.
Përveç aksioneve në terren, autoritetet kryen edhe një kontroll brenda burgut ku qëndronte i dyshuari si organizator. Hetimet vazhdojnë dhe autoritetet nuk përjashtojnë mundësinë e arrestimeve të tjera në kuadër të këtij operacioni.
