Mazhoranca dhe deputetët e Parlamentit Europian në Komitetin Parlamentar të Stabilizim-Asociimit rrëzuan dy amendamente që lidhen me zonën e mbrojtur Vjosa–Narta dhe me imunitetin parlamentar. Socialistët thanë se të dyja çështjet pasqyrohen në Rezolutën e Parlamentit Europian dhe janë bashkëngjitur këshillit pa qenë e nevojshme t’i përfshinin në rezolutën e diskutuar në Komitet.
Amendamenti lidhur me zonat e mbrojtura kërkonte vendosjen e një moratoriumi për lejet e ndërtimit, një term që sipas tekstit është miratuar edhe në rezolutën e Parlamentit Europian. Teksti i amendamentit shpreh shqetësim serioz për zhvillimet brenda zonës së mbrojtur Vjosa–Narta, vëzhgon protestat masive paqësore dhe u bën thirrje autoriteteve shqiptare të vendosin menjëherë një moratorium për të gjitha procedurat e reja të dhënies së lejeve, punimet e ndërtimit dhe ndërhyrjet zhvillimore deri në shfuqizimin e dispozitave të papajtueshme të ligjit të ndryshuar “Për Zonat e Mbrojtura” dhe deri në garantimin e përputhshmërisë me standardet e Bashkimit Evropian për mbrojtjen e natyrës.
Bashkëkryetari i Komitetit Parlamentar të Stabilizim-Asociimit BE–Shqipëri, Taulant Balla, deklaroi se në legjislacionin shqiptar nuk ekziston një zonë e quajtur Vjosa–Narta, por janë dy parqe të ndara, parku i Vjosës dhe parku i Nartës, dhe bëri të ditur se parku i Vjosës është zonë e mbrojtur. Ai përmendi ankesën lidhur me aeroportin e Vlorës, tha se aty ka ekzistuar një aeroport më parë dhe argumentoi se vendi ka nevojë për një aeroport në Jug, duke e lidhur këtë çështje me konkurrencën. Balla propozoi që takimi të mbahej në Vlorë dhe të realizohej një mision fakt-mbledhës, jo për politikë apo shpërndarje lajmesh në media sociale, dhe theksoi nevojën për promovimin e turizmit të qëndrueshëm, krijimin e vendeve të punës, tërheqjen e investimeve dhe mbrojtjen e aspekteve mjedisore si pjesë të një kuadri të bashkërenduar për rritje ekonomike dhe mjedisore, si edhe luftën kundër dezinformimit.
Amendamenti 8a rikujtonte se imuniteti parlamentar është pjesë e kuadrit kushtetues dhe duhet zbatuar në përputhje me procedurat ligjore, duke shprehur shqetësim për vendimet e Kuvendit dhe komentet publike që mund të rrezikojnë pavarësinë e SPAK-ut dhe institucioneve të tjera të drejtësisë, dhe kërkonte që vendimet për heqjen e imunitetit të udhëhiqen nga standardet evropiane, përfshirë opinione dhe rekomandime të Komisionit të Venecias.
