Në Gjykatën e Posaçme kundër Korrupsionit dhe Krimit të Organizuar po zhvillohet seanca e gjykimit në themel ndaj ish-presidentit Ilir Meta dhe deputetes Monika Kryemadhi. Kryemadhi mbërriti e veshur me një bluzë ku shkruhej “Është një ditë e mrekullueshme” dhe gjatë seancës ngriti pretendime për shkelje procedurale dhe kundërshtoi provat e paraqitura nga SPAK, duke deklaruar se i është mohuar e drejta për t’u mbrojtur.
Ajo kërkoi që SPAK t’i vinte në dispozicion procesverbalet e ekspertimit të telefonit, të cilat sipas saj nuk ndodhen në fashikull, dhe theksoi mungesën edhe të ekspertizës financiare që u dorëzua vetëm në muajin gusht. Kryemadhi tha se për një proces të rregullt duhen të gjitha provat dhe se nuk pranon që prova t’i jepen një ditë njëra, një ditë tjetra, jashtë kontekstit. Gjykata e pyeti nëse kishte nënshkruar procesverbal për marrjen e akteve; Kryemadhi u përgjigj se kishte marrë gjashtë disqe, por dokumentet përkatëse nuk ekzistojnë dhe në diskun e tretë ka skedarë që nuk hapen. Ajo kërkoi të di me çfarë vendimi është kryer ekspertimi i telefonit, cili ekspert e ka bërë dhe në çfarë date, duke argumentuar se e gjithë akuza ndërtohet mbi mesazhet dhe ka nevojë për dokumentacionin përkatës.
Prokurori i SPAK, Sotir Kllapi, deklaroi se aktet e ekspertimit të telefonave të sekuestruar gjenden në fashikullin 62, i dorëzuar gjykatës, dhe se në fashikullin 63 janë procesverbalet e këqyrjes së tyre, përfshirë një procesverbal të plotë dhe një të pjesshëm. SPAK tha gjithashtu se telefoni është një iPhone dhe se nuk dihet nëse ka qenë në përdorim të zonjës Kryemadhi, pasi telefoni u gjet në banesën e Fatime Kryemadhit.
Avokati i Kryemadhit kërkoi sqarime pse organi i akuzës nuk i ka njoftuar dhe pse mbrojtja nuk ka pasur mundësi të jetë e pranishme gjatë veprimeve procedurale. Kryemadhi akuzoi se akuza ndaj saj është “seksiste”, duke thënë se është paraqitur si shërbëtore dhe se nuk ka komunikime me Ilir Metën për çështjen e Adrian Shatkut. Ajo përmendi se në komunikime ka vetëm mesazhe të djalit të saj dhe pyeti pse nuk janë përfshirë komunikimet për çështjet e hipotekave në Pogradec e Lezhë, apo pse nuk është thirrur Taulant Balla si dëshmitar. Kryemadhi deklaroi se ka qenë person i pavarur dhe do të ndjekë të gjitha procedurat. Top Channel.
