Një familje në ndihmë ekonomike në zonën e Kombinatit mori një faturë të energjisë elektrike prej 90 mijë lekësh, ndërsa pretendon se matësi nuk ishte lexuar për më shumë se një vit. Pas ankesës në emisionin investigativ “Fiks Fare”, çështja mori zgjidhje. Flora Ismaili deklaroi se jeton në kushte të vështira ekonomike dhe se konsumi i saj është minimal: në banesë ka vetëm një sobë dhe një frigorifer ekonomik, ndaj e konsideron të pajustifikuar faturën e lartë. Në një moment ajo tha: “Unë nuk kam furrë buke apo pajisje që harxhojnë shumë energji. Nuk kam mundësi të paguaj 900 mijë lekë të vjetra menjëherë”.
Familja kishte një aktmarrëveshje të mëparshme për shlyerjen e detyrimeve ndaj OSHEE-së, por sipas Florës, pas ankesës në zyrat e OSHEE-së iu komunikua se marrëveshja ekzistuese prishej dhe se detyrimet do të rinisnin nga e para. Pas interesimit të “Fiks Fare”, reagoi Operatori i Shpërndarjes së Energjisë Elektrike. Zëdhënësi i OSHEE-së, Ardi Kola, sqaroi se problemi erdhi nga mosleximi i rregullt i matësit për shkak të mungesës së faturistit në zonë. Ai tha se zona ishte mbuluar përkohësisht nga faturistë të tjerë që nuk kishin njohuri të plota mbi strukturën e abonentëve, gjë që solli pasaktësi në faturim.
OSHEE njoftoi se tashmë matësi lexohet rregullisht dhe se familja do të përfitojë mundësinë e pagesës me këste. Sipas kompanisë, për detyrimet e prapambetura familja do të paguajë vetëm 1,000 lekë në muaj, së bashku me faturën e konsumit aktual. Në fund të raportimit, Flora falënderoi stafin e “Fiks Fare” për ndërhyrjen dhe zgjidhjen e problemit, duke thënë se pa ndihmën e emisionit nuk do të kishte gjetur zgjidhje dhe se është dakord ta paguajë me këste.
