Koment nga Timoni.al
Ndërsa mijëra familje shqiptare mezi përballojnë çmimet, taksat dhe faturat e përditshme, lind një pyetje që po qarkullon gjithnjë e më shumë mes qytetarëve: sa paguhet sot një efektiv i Policia e Shtetit që të mos shohë atë që pretendohet se ndodh para syve të të gjithëve? Denoncimet për aktivitet të paligjshëm bastesh sportive të lidhura me emrin e Ardit Kraja nuk janë më thashetheme kafesh, por akuza publike që po qarkullojnë prej kohësh, ndërsa institucionet shqiptare vijojnë të heshtin.
Sipas denoncimeve të publikuara, në ambientet “Dua Kafe” në Tiranë pretendohet se zhvillohet aktivitet i paligjshëm bastesh sportive, ku qarkullojnë miliona euro jashtë çdo kontrolli fiskal dhe ligjor. Dhe pyetja që lind natyrshëm është: si ka mundësi që në një vend ku policia kontrollon biznese, makina, qytetarë e kamera sigurie, të mos konstatohet një aktivitet që përflitet hapur nga qytetarët? Apo ndoshta problemi nuk është mungesa e informacionit, por mungesa e vullnetit për të vepruar?
Ironia më e madhe është se shteti tregohet i pamëshirshëm me qytetarin e zakonshëm. Për një kupon të pafiskalizuar, për një vonesë dokumenti apo për një shkelje të vogël, bizneset e vogla përballen me gjoba dhe kontrolle të menjëhershme. Por kur bëhet fjalë për njerëz të fuqishëm ekonomikisht, që përfliten për miliona euro në qarkullim, institucionet duken sikur verbohen papritur. Kjo është arsyeja pse shumë qytetarë sot nuk pyesin më nëse ekziston fenomeni, por kush po e mbron atë.
Fakti që Ardit Kraja është arrestuar nga autoritetet e Kosovës dhe rezulton i kërkuar nga gjykata atje për çështje që lidhen me bixhozin ilegal, vetëm sa e bën më të rëndë heshtjen e institucioneve shqiptare. Nëse një shtet fqinj arrin të veprojë dhe të ndërmarrë masa, pse në Shqipëri nuk shohim as kontrolle, as reagime, as transparencë? A mos vallë ka njerëz që garantojnë paprekshmëri për sa kohë miliona euro vazhdojnë të qarkullojnë?
Qytetarët kanë nevojë për përgjigje, jo për heshtje. Nëse denoncimet janë të pavërteta, atëherë institucionet duhet të dalin publikisht dhe ta provojnë. Por nëse ka të vërteta pas tyre, atëherë çdo minutë heshtjeje është një njollë mbi besimin tek shteti dhe drejtësia. Sepse kur ligji godet vetëm të dobëtin dhe mbyll sytë përballë të fortit, qytetarët humbin besimin se jetojnë në një shtet ku të gjithë janë të barabartë para ligjit.
