Aventurës së Domenico Tedescos në stolin e Bolognës i erdhi fundi pas vetëm katër ndeshjesh në kampionat dhe me vetëm një pikë të grumbulluar. Klubi kuqeblu zyrtarizoi shkarkimin ditën e mërkurë, përmes një komunikate për shtyp në të cilën e falënderoi trajnerin për punën, profesionalizmin dhe kompetencat e tij, duke i uruar atij dhe bashkëpunëtorëve fatin më të mirë në aspektin profesional. Në komunikatën e Bolognas u lexua konkretisht: “Bologna bën të ditur shkarkimin e trajnerit Domenico Tedesco të cilin e falenderojmë për punën e bërë dhe profesionalizmin dhe kompetencat e tij. Atij dhe bashkëpunëtorëve të tij, i urojmë fatin më të mirë në aspektin profesional.”
Vendimi erdhi pas një takimi që u zhvillua të martën gjatë drekës midis drejtuesve të klubit dhe tedescos, ish-trajner i përfaqësueses së Belgjikës. Drejtuesit shprehën shqetësime për drejtimin që kishte marrë skuadra, jo vetëm për rezultatet zhgënjyese, por edhe për mungesën e përmirësimit të nivelit të lojës. Sipas raportimeve, përveç figurës së tij si trajner, u vlerësua se loja e ekipit nuk kishte shfaqur rritje cilësore që të justifikonte vazhdimin e procesit.
Tedesco pranoi vërejtjet e klubit dhe mori përsipër përgjegjësinë për fillimin e trazuar të sezonit. Megjithatë, ai nuk dha dorëheqje, duke shprehur dëshirën për të tentuar të rregullonte situatën dhe për të vazhduar punën. Në orët e mbrëmjes, drejtuesit e Bolognas morën vendimin për ta larguar atë dhe për të emëruar menjëherë pasuesin.
Si zëvendësues u prezantua Rafaele Palladino, i cili nënshkroi një kontratë trevjeçare që skadon më 30 qershor 2029. Palladino pritet të nisë menjëherë detyrën te Bologna dhe në pasditen e pasueshme do të kryejë stërvitjen e tij të parë me skuadrën.
